Salmos 122 - Biblia SEPT

(121) Saúdo a Xerusalén

1 Cántiga das subidas, de David.

¹ Cántiga das subidas, de David. Alegreime, cando me dixeron: imos para a casa do Señor.

² Xa están os nosos pés ás túas portas, Xerusalén,

³ Xerusalén, cidade ben feita, de compacta harmonía.

⁴ Alá soben as tribos, as tribos do Señor, conforme o costume de Israel, para festexar o nome do Señor.

⁵ Alí están os tribunais da xustiza, a sede da casa de David.

⁶ Saudade así a Xerusalén: —"Teñan prosperidade os que te queren,

⁷ que haxa paz nos teus muros e contento nos teus pazos".

⁸ Por mor de meus irmáns e compañeiros direi eu: —"A paz contigo".

⁹ Por mor da casa do Señor, o noso Deus, deséxoche todo ben.