Salmos 118 - Biblia SEPT

(117) Cantares na casa dos xustos

¹ Loade o Señor porque é bo, porque o seu amor é eterno.

² Que o diga a casa de Israel: o seu amor é eterno;

³ que o diga a casa de Aharón: o seu amor é eterno;

⁴ que o digan os que temen ó Señor: o seu amor é eterno.

⁵ No apuro invoco o Señor e El escóitame e líbrame.

⁶ O Señor está comigo: non teño cousa que temer; que me poden facer os homes?

⁷ O Señor está comigo: El é quen me axuda: verei os meus inimigos en desfeita.

⁸ Mellor é acollerse ó Señor que fiarse dos homes.

⁹ Mellor é acollerse ó Señor que fiarse dos grandes.

¹⁰ Rodéame un fato de pobos: no nome do Señor esmagareinos;

¹¹ póñenme cerco e apúranme: no nome do Señor esmagareinos;

¹² envólvenme coma abellas, quéimanme coma o lume os espiños: no nome do Señor esmagareinos.

¹³ Empurran, empurran para tirarme, pero o Señor é o meu auxilio.

¹⁴ O Señor é a miña forza, o meu cantar, El é a miña salvación.

¹⁵ Oense cantares de gozo e de vitoria nas moradas dos xustos: a dereita do Señor é valente,

¹⁶ A dereita do Señor é poderosa, a dereita do Señor é valente.

¹⁷ Non hei morrer, vivirei e cantarei os feitos do Señor.

¹⁸ O Señor, certo, castígame, mais non me entrega á morte.

¹⁹ Abrídeme as portas da vitoria: quero cantar e dar grazas ó Señor.

²⁰ Esta é a porta do Señor: os xustos entran por ela.

²¹ Douche as grazas porque me escoitas: ti es a miña salvación.

²² A pedra que desbotaron os canteiros convértese en pedra angular.

²³ Isto é cousa do Señor, admirable feito á nosa vista.

²⁴ Este é o día en que obra o Señor: relouquemos e alegrémonos nel.

²⁵ Ai, Señor, dános a salvación! Ai, Señor, dános prosperidade!

²⁶ Benditos os que veñen no nome do Señor: bendicímosvos desde a casa do Señor.

²⁷ O Señor é Deus: El dános a luz. Ordenade festa con ramos ata á beira do altar.

²⁸ Meu Deus, douche as grazas, meu Deus, quero enxalzarte.

²⁹ Loade o Señor porque é bo, porque o seu amor é eterno.