Salmos 114 - Biblia SEPT

(113 A) A terra danza

¹ Cando Israel saíu de Exipto, a familia de Xacob dun pobo estraño,

² foi Xudá o seu santuario, Israel o seu dominio.

³ Viuno o mar e fuxiu, o Xordán botouse atrás;

⁴ os montes brincaron coma carneiros, os outeiros coma años.

⁵ Que che pasa, mar, para fuxires, Xordán, para te botares atrás,

⁶ montes, para brincardes coma carneiros, e vós, outeiros, coma años?

⁷ Na presenza do Señor danza a terra, na presenza do Deus Xacob,

⁸ o que converte o penedo en estanque, a rocha en fonte de augas.