Salmos 113 - Biblia SEPT

(112) Deus ergue os pobres da poeira

¹ Aleluia. Loade, servidores do Señor, loade o nome do Señor.

² Bendito sexa o nome do Señor, agora e por sempre.

³ Desde o nacente ó poñente loado sexa o nome do Señor.

⁴ Excelso sobre as xentes é o Señor, sobre o ceo a súa gloria.

⁵ Quen coma o Señor, noso Deus, que habita nas alturas

⁶ e que baixa para coidar do ceo e mais da terra?

⁷ El ergue do po os indixentes, levanta os pobres da poeira,

⁸ para lles dar asento cos nobres, cos nobres do seu pobo.

⁹ El fai da estéril da casa nai ditosa de fillos. Aleluia.