Salmos 112 - Biblia SEPT

(111) A prosperidade duradeira

¹ Aleluia. Ditoso o que teme ó Señor e ten gozo nos seus preceptos.

² A súa descendencia será forte na terra, a liñaxe dos rectos é bendita.

³ Na súa casa hai bens abondo e a súa prosperidade é duradeira.

⁴ Nas tebras brilla unha luz para os rectos, os xustos, os misericordiosos e os clementes.

⁵ Benia quen se apiada e presta, e goberna os seus bens con xustiza.

⁶ Endexamais non perecerá, pois de eterna lembranza son os rectos.

⁷ Non terá medo de malas noticias, pois o seu corazón confía no Señor.

⁸ O seu corazón está firme e sen medo, mentres olla os seus opresores na desfeita.

⁹ Dálles xenerosamente ós pobres, a súa prosperidade é duradeira: erguerá con honor a súa fronte.

¹⁰ O malvado irrítase ó velo, renxe os dentes, ensómese, pois os seus proxectos bótanse a perder.