Salmos 111 - Biblia SEPT

(110) Feitos poderosos

¹ Aleluia. Loarei o Señor con todo o corazón na xuntanza dos xustos, na asemblea.

² Grandes son as obras do Señor, dignas de estudio para todos os que as aman.

³ Gloriosos e espléndidos son os seus feitos, a súa xustiza é eterna:

⁴ fai prodixios memorables.

⁵ Dá mantenza a quen o teme e recorda por sempre a súa alianza.

⁶ El móstralle ó seu pobo feitos poderosos, dándolle a herdanza das nacións.

⁷ As obras das súas mans son xustas e leais, os seus preceptos son firmes:

⁸ están fixados polos séculos, feitos con sinceridade e rectitude.

⁹ El mándalle a liberación ó seu pobo, corrobora por sempre a súa alianza; santo e terrible é o seu nome.

¹⁰ O temor do Señor é o principio da sabedoría: asisados son os que o practican; a súa loanza é eterna.