Proverbios 7 - Biblia SEPT

Retrato da sedutora

¹ Meu fillo, atende as miñas razóns, garda dentro de ti os meus mandatos;

² observa os meus preceptos para que vivas e o meu ensino coma a meniña dos teus ollos;

³ Átaos ós teus dedos, escríbeos na táboa do teu corazón.

⁴ Dille á sabedoría: —"Ti es a miña noiva", chámalle á intelixencia: —"Prometida",

⁵ de xeito que te garde da muller allea e das verbas suaves da estranxeira.

⁶ Por certo, estaba eu na fiestra da miña casa, ollando pola cancela,

⁷ e velaquí que descubrín entre os inxenuos, percibín entre os rapazotes, un mozo sen siso

⁸ Atravesando a rúa na revolta e dirixirse camiño da súa casa.

⁹ Era entre lusco e fusco, no serán, no escuro da lúa nova.

¹⁰ E velaí que lle sae ó encontro unha muller co vestido e xeitos arteiros dunha mala femia,

¹¹ desenvolta e inqueda; os pés non a puideran reter na casa:

¹² sexa na rúa, sexa na casa, está sempre a axexar por todos os recantos.

¹³ Entón aferra nel e bícao e con descaro dille:

¹⁴ —"Estaba a preparar un banquete sacrificial, pois hoxe teño que cumprir os meus votos;

¹⁵ por iso saín por te invitar, procureite por todas as partes e xa te encontrei;

¹⁶ cubrín o meu leito de tapetes, con cobertores de cor, de liño de Exipto;

¹⁷ perfumei a alcoba con mirra, áloe e nardo.

¹⁸ Ven, embriaguémonos de agarimos ata o amencer, gocémonos cos nosos amoríos,

¹⁹ que o meu home non está na casa, vai de viaxe para tempo;

²⁰ levou consigo a bolsa do diñeiro e non volverá ata a lúa chea".

²¹ Sedúceo ela deste xeito coas súas moitas razóns e arrástrao cos seus labios falaces.

²² E o parviño vai tras ela coma vai o boi ó matadoiro, coma o cervo se enguedella no lazo,

²³ coma o paxaro voa cara á trampa ata que a frecha lle atravesa o fígado, sen se decatar que aí lle vai a vida.

²⁴ Polo tanto, filliños, escoitádeme, atendede as miñas palabras:

²⁵ Non dobregues o teu ánimo para os seus camiños, non te extravíes nas súas vereas,

²⁶ que moitos son os feridos que ela guindou, todas as súas vítimas son innumerables,

²⁷ A súa casa é o camiño do Xeol que descende ata as moradas da morte.