Proverbios 6 - Biblia SEPT

Non deas fianza

¹ Meu fillo, se saíches fiador polo teu veciño, ou deches unha aperta de mans por un estraño;

² se te enguedellaches nas túas propias verbas ou te cazaron con palabras da túa boca,

³ obra deste xeito, meu fillo, e ponte a salvo xa que caíches na man do teu veciño: vai, humíllate e importúnao,

⁴ non lles deas sono ós teus ollos nin acougo ás túas pálpebras;

⁵ céibate, coma gacela, do cazador, coma o paxaro da man do trampuzas.

O nugallán e a formiga

⁶ Ergue e vai cabo da formiga, preguiceiro, considera o seu xeito, e faite sabio:

⁷ Ela non ten xefe, nin capataz, nin gobernante;

⁸ Almacena o seu gran no estío, achega o seu xantar durante a colleita.

⁹ E ti, nugallán, canto tempo vas durmir? Cando te vas erguer do sono?

¹⁰ Un pouquiño a durmir, un pouquiño a adurmiñar, un pouquiño a deitarse cos brazos cruzados

¹¹ e a pobreza chega coma un vagabundo e a necesidade coma un mendigo.

O malvado

¹² Persoa argalleira é o malvado: procede con retranca ó falar,

¹³ chisca o ollo, fai xogos cos pés e sinala co dedo,

¹⁴ trama perversidades e matina o mal, e sempre anda a espallar liortas;

¹⁵ por iso lle ha vir de súpeto a desgraza e nun intre será esnaquizado sen remedio.

O antisocial

¹⁶ Seis cousas hai que o Señor refuga e mais unha sétima que El aborrece:

¹⁷ ollos altivos, lingua mentireira, mans que esparexen sangue inocente,

¹⁸ mente que cisma en planos perversos, pernas que corren cara á maldade,

¹⁹ quen levanta falso testemuño e quen sementa preitos entre irmáns.

Fuxe da adúltera

²⁰ Garda, meu fillo, o mandato de teu pai e non refugues o ensino de túa nai;

²¹ lévaos decote atados á túa conciencia, pendúraos do teu pescozo.

²² Estando de viaxe guiarante; deitado, vixiarante; ergueito, falarán contigo.

²³ Pois o mandato é unha candea; o ensino, unha luz, e a instrución correctiva é camiño da vida,

²⁴ para te gardares da muller maligna, da suave lingua da estranxeira.

²⁵ Non areles con paixón a súa beleza, que non te escravice coas súas pálpebras,

²⁶ porque o prezo da rameira é un anaco de pan mais a casada vai á caza dunha vida preciosa.

²⁷ Pode alguén levar lume no peto sen que lle ardan os vestidos?

²⁸ Poderá camiñar sobre ascuas sen que se lle queimen os pés?

²⁹ Pois tal acontece co que se achega á muller do veciño; quen a toque non quedará indemne.

³⁰ Non se aldraxa a un ladrón cando rouba para encher o seu estómago famento,

³¹ pero se o atrapan terá que restituír o séptuplo, ha de deixar canto teña de valer na casa.

³² Quen comete adulterio cunha muller non ten siso; o que a viola, destrúese a si mesmo;

³³ Atopará violencia e infamia, non borrará a súa vergonza,

³⁴ porque os celos inflaman ó marido e non terá piedade cando se vingue,

³⁵ non considerará compensación ningunha, nin aceptará agasallos por moitos que lle mandes.