Proverbios 4 - Biblia SEPT

A Sabedoría desposada

¹ Escoitade, fillos, a instrución dun pai, dade atención para aprender intelixencia;

² É unha boa tradición o que vos dou, non esquezades o meu ensino,

³ pois tamén eu fun fillo de meu pai fillo único e querido de miña nai.

⁴ Cando el me ensinaba, dicía: —"Que o teu ánimo recolla as miñas palabras, garda os meus mandatos e medrarás!

⁵ Adquire Sabedoría, adquire intelixencia, non as esquezas nin te afastes dos meus ditos.

⁶ Non a repudies; ela hate gardar; quérea ben e hate protexer.

⁷ Esencia de Sabedoría é: Adquire Sabedoría! e mesmo por canto teñas, procura a intelixencia.

⁸ Faille agarimos, e enxalzarate; dálle unha aperta, e encherate de honor;

⁹ porá na túa cabeza unha diadema xeitosa, darache en agasallo unha coroa espléndida".

Aparta do mal camiño

¹⁰ Filliño, escoita e acolle as miñas razóns para que se che multipliquen os anos de vida.

¹¹ Eu diríxote polo camiño da Sabedoría guíote por un vieiro recto;

¹² O camiñares non serán impedidos os teus pasos; se botas a correr non tropezarás.

¹³ Aférrate á instrución, non a deixes da man; gárdaa, pois nela vaiche a vida.

¹⁴ Non collas para o vieiro dos malvados nin te encamiñes pola xeira dos perversos:

¹⁵ tíraa da cabeza, non atraveses por ela, dá un rodeo e sigue adiante;

¹⁶ pois os tales non dan durmido se non fixeron algunha, non lles vén o sono se non afundiron a alguén;

¹⁷ xantan do pan do crime, beben do viño da violencia.

¹⁸ Nembargantes o vieiro dos xustos é coma a luz do abrente e vai medrando ata o pleno día;

¹⁹ en troques o camiño dos malvados é coma a tebra, non saben contra onde van bater.

O control da conciencia

²⁰ Meu fillo, está atento ás miñas palabras, tende a orella ó que che vou dicir,

²¹ non as perdas de vista, gárdaas ben no sentido;

²² son vida para quen dá con elas, e un tónico total para o seu corpo.

²³ Por riba de todo garda o corazón pois del burbullan os mananciais da vida;

²⁴ Afasta de ti a fala perversa alonga de ti os labios falsos;

²⁵ que os teus ollos miren dereito e as túas olladas vaian de fronte;

²⁶ ten coidado onde pos as túas pegadas, e sexan firmes todas as túas vías;

²⁷ non vires nin para a dereita nin para a esquerda, arreda os teus pés do mal.