Proverbios 27 - Biblia SEPT

¹ Non te gabes do mañá, que non sabes que traerá o hoxe.

² Lóuvete outro, e non a túa boca; un alleo, e non os teus labios.

³ Peso de pedra, carga de area: máis cós dous pesa a carraxe do tolo.

⁴ Cruel é a ira; e unha enxurrada, o noxo, pero contra os celos quen se pode manter?

⁵ Mellor é reproche patente cá amizade acubillada.

⁶ As feridas de amigo son de lei, os bicos do inimigo son finxidos.

⁷ Andorga farta patea no mel, para a gorxa famenta é doce o amargo.

⁸ Pardal que revoa lonxe do niño, é quen anda errante lonxe do seu eido.

⁹ Perfume e incenso alegran o corazón, a dozura da amizade dálle forza ó espírito.

¹⁰ Non desbotes ó teu amigo nin ó de teu pai, e non terás que ir á casa de teu irmán no día da desgraza.

¹¹ Meu fillo, faime feliz sendo sabio, e terei resposta que dar a quen me aldraxe.

¹² O asisado ve o perigo, e apártase; os docas tiran para diante, e páganas.

¹³ Queda ti co seu vestido, pois deu prenda por un alleo e puxo fianza por unha estranxeira.

¹⁴ Quen xa de mañanciña saúda ó veciño a berros, é coma se o maldicise.

¹⁵ Pingar arreo nun día de orballada e muller rifadora son cousas parellas;

¹⁶ quen a retén, retén vento, e recolle aceite na man.

¹⁷ Co ferro afíase o ferro, e o home a carón do próximo.

¹⁸ Quen coida da figueira, xantará do froito; quen garda ó seu amo, será honrado.

¹⁹ Coma as augas reflicten o rostro, así a intención reflicte ó home.

²⁰ Xeol e abismo non se dan fartos, tampouco se enchen os ollos do home.

²¹ O forno proba a prata; o crisol, o ouro; e o home, a opinión de quen o gaba.

²² Aínda que esnaquices o tolo cun mazo nun morteiro mesturado coa area, non lle tirarás fóra a necidade.

²³ Repara ben no aspecto da túa grea e ten boa conta dos teus rabaños,

²⁴ pois a facenda non dura sempre nin as riquezas de xeración en xeración;

²⁵ Apañada a herba e despuntado o gromo, recolleita a forraxe das montañas,

²⁶ os años forneceranche vestido e as cabuxas terán o prezo dunha leira,

²⁷ terás leite de cabra abondo para a túa mantenza para a mantenza da túa casa e sustento das túas criadas.