Proverbios 25 - Biblia SEPT

TAMÉN ESTES SON PROVERBIOS DE SALOMÓN (25-29) Antoloxía "A" (25-27)

¹ Tamén estes son Proverbios de Salomón, transcritos polos homes de Ezequías, rei de Xudá.

² Gloria de Deus é agachar unha razón, honra dos reis é inquirila.

³ A altura do ceo, o fondo da terra e a mente dos reis non hai quen os abranga.

⁴ Remove a escoura da prata, e o ourive fará dela unha obra de arte;

⁵ Aparta ó malvado do servizo do rei, e o seu trono afincará na xustiza.

⁶ Non te deas aires na presenza do rei nin ocupes os postos dos grandes;

⁷ mellor é que che digan: —"achégate aquí", que ter que ser deposto diante da nobreza. O que os teus ollos viron

⁸ non te apures a citalo no proceso, pois que farás ó remate, cando o teu contrincante logre avergonzarte?

⁹ Arranxa o teu preito co veciño, e non descubras segredos doutro,

¹⁰ non sexa que quen te escoite te inxurie e non se poida reparar a túa infamia.

¹¹ Mazás douradas en bandexas de prata son as palabras ditas con xeito.

¹² Anel de ouro e alfaia de ouro fino é a reprensión dun sabio para o oído atento.

¹³ Frescor de neve nun día de seitura é o mensaxeiro fiel para quen o envía: reconforta o ánimo do seu amo.

¹⁴ Nubes e vento sen chuvia é quen se gaba de regalar quincalla.

¹⁵ Tendo paciencia persuádese a un príncipe, pois unha lingua suave quebra ósos.

¹⁶ Se atopas mel, come só o que cómpre, non sexa que te fartes e o vomites;

¹⁷ pon o pé de raro en raro na casa do veciño, non sexa que se farte de ti e te aborreza.

¹⁸ Maza, espada e frecha afiada é quen testemuña en falso contra o amigo.

¹⁹ Moa picada e pé tolleito é afiuzar no traidor o día da angustia.

²⁰ Andar espido nun día de xeada, botar vinagre nunha ferida, iso é o cantar cántigas co corazón magoado.

²¹ Se o teu inimigo ten fame, dálle pan a comer; e se ten sede, dálle auga a beber;

²² poraslle carbóns ardentes na cabeza e o Señor hache recompensar.

²³ O vento nordés pare chuvias; a lingua murmuradora, facianas irritadas.

²⁴ Mellor é habitar nun recuncho do faiado, ca con muller enredante en casa grande.

²⁵ Auga fresca para boca sedenta é unha boa noticia de país remoto.

²⁶ Manancial túrbido e fonte emporcada é o xusto que abranda ante o impío.

²⁷ Non é san darse unha enchente de mel, nin procurar honores tras honores.

²⁸ Cidadela desmantelada e sen muro: o home que non se sabe conter.