Oseas 14 - Biblia SEPT

¹ Samaría vai ser arrasada, pois rebelouse contra o seu Deus; caerán a espada, os seus meniños serán escachizados, as súas mulleres en cinta serán rebentadas.

Chamada á conversión e á liturxia penitencial

² Vólvete, Israel, ó Señor teu Deus, xa que caíches por culpa da túa iniquidade.

³ Discorrede un discurso, volvede ó Señor e dicídelle: "Perdoa totalmente a culpa; si, acóllenos a palabra; queremos agradecercho co froito dos nosos labios.

⁴ Asiria non nos pode salvar, non queremos montar a cabalo, non queremos volver a chamar Deus noso á obra das nosas mans. Pois en ti o orfo atopa compaixón".

⁵ Eu curarei a súa apostasía, e querereilles de boa gana, si, apartarei deles a miña ira.

⁶ Serei coma orballo para Israel, florecerá coma o lirio e chantará as raíces coma o bosque do Líbano.

⁷ Os seus xermolos medrarán e será coma a oliveira a súa beleza e o seu perfume coma o do bosque do Líbano.

⁸ Volverán a habitar á miña sombra, cultivarán o trigo, lembrándose de min florecerán coma a viña, coma o viñedo do Líbano.

⁹ A Efraím, para que lle volverán a servir os ídolos? Eu son, eu, quen o escoito e teño coidado del. Eu son coma o ciprés sempre verde, en min atópase froito para ti.

Conclusión sapiencial

¹⁰ Quen é o sabio que entenda estas cousas, o entendido que as coñeza? Pois son rectos os camiños do Señor e os xustos camiñan por eles, mentres que os que renegan tropezan neles.