Oseas 13 - Biblia SEPT

CHAMADA Á CONVERSIÓN E Á PENITENCIA Oráculos de condenación

¹ Cando Efraím falaba, daba medo, era sublime en Israel; pero fíxose culpable con Baal, e mereceu morrer.

² Pois agora continúa pecando, fai ídolos de fundición, da súa prata fai con habilidade ídolos. Todo iso é obra de artistas. Din eles: "Ofrecédelles sacrificios a eles, que os homes biquen os becerros".

³ Por isto volveranse coma néboa de mañanciña, e coma orballo que pasa á madrugada, coma a muíña que voa da eira, coma fume que escapa polo ventanuxo.

⁴ Si, eu son o Señor, o teu Deus, desde o país de Exipto, e deuses fóra de min non debes recoñecer, pois non hai outro salvador, senón eu.

⁵ Eu pastoreeite no deserto, na terra do sequeiro

⁶ Si, fíxenos pacer e fartáronse; fartáronse e ensoberbeceuse o seu corazón, por isto esquecéronse de min.

⁷ Si, eu serei para eles coma un tigre que apresa, coma un leopardo estarei á espreita á beira do camiño.

⁸ Atacareinos coma un oso a quen lle quitaron as crías, e arrincareilles a caixa do corazón, alí devorareinos coma unha leoa, os animais salvaxes esgazaranos en triscos.

⁹ Voute destruír, Israel; si, quen virá na túa axuda?

¹⁰ Onde está o teu rei, para que te auxilie a ti e ás túas cidades? E onde están os teus soberanos dos que dixeches: "Dáme un rei e uns príncipes"?

¹¹ Concedinche un rei, movido polo meu noxo; e retireino, movido pola miña ira.

Reflexión acerca da vida e da morte

¹² Envolta está a iniquidade de Efraím, escondido o seu pecado.

¹³ As dores do parto chéganlle a Efraím, pero el é un fillo parvo: chegou a hora, non entra por onde rompen os fillos.

¹⁴ Vou libralos do poder do Xeol, vou rescatalos da Morte. Onde está, Morte, o teu aguillón? Onde está, Xeol, a túa aguillada? A misericordia está escondida dos seus ollos.

¹⁵ Si, mentres el está medrando entre a herba, vén o vento do leste, o vento do Señor que sobe do deserto, e fai secar a súa fonte, reseca o seu viveiro. O Señor vai saquear os tesouros, todos os obxectos preciosos.