Números 33 - Biblia SEPT

Resume das etapas da viaxe

¹ Estas son as etapas dos fillos de Israel, que saíron de Exipto por unidades militares baixo o mando de Moisés e Aharón.

² Moisés anotou por escrito os puntos de partida, etapa por etapa, por orde do Señor. Estas son as súas etapas conforme os seus puntos de partida.

³ Partiron de Ramsés no primeiro mes, o día quince do mes primeiro. O día seguinte da Pascua saíron os fillos de Israel coa man levantada, ós ollos de todo Exipto,

⁴ mentres os exipcios enterraban a todos os seus primoxénitos, que o Señor ferira de morte, como proba de que era máis poderoso cós seus deuses.

⁵ Partiron, pois, os fillos de Israel de Ramsés, e acamparon en Succot.

⁶ Partiron de Succot e acamparon en Etam, que está ó extremo do deserto.

⁷ Partiron de Etam, e volveron polo camiño de Pihahirot —que está fronte a Baal-Sefón—, e acamparon diante de Migdol.

⁸ E saíron de Pihahirot, e atravesaron polo medio do mar de cara ó deserto; andaron o camiño de tres días no deserto de Etam e acamparon en Marah.

⁹ Partiron de Marah, e chegaron a Elim, onde había doce fontes de auga e setenta palmeiras, e alí acamparon.

¹⁰ Partiron de Elim, e acamparon na beira do Mar Rubio.

¹¹ Partiron do Mar Rubio, e acamparon no deserto de Sin.

¹² Partiron do deserto de Sin, e acamparon en Dofcah.

¹³ Partiron de Dofcah, e acamparon en Alux.

¹⁴ Partiron de Alux, e acamparon en Refidim, onde non había auga que beber para o pobo.

¹⁵ Partiron de Refidim, e acamparon no deserto de Sinaí.

¹⁶ Logo partiron do deserto de Sinaí e acamparon en Quibrot-ha-tavah.

¹⁷ Partiron de Quibrot-ha-tavah e acamparon en Haserot.

¹⁸ Partiron de Haserot e acamparon en Ritmah.

¹⁹ Partiron de Ritmah, e acamparon en Rimón-Peres.

²⁰ Partiron de Rimón-Peres e acamparon en Libnah.

²¹ Partiron de Libnah e acamparon en Rissah.

²² Partiron de Rissah e acamparon en Quehelatah.

²³ Partiron de Quehelatah e acamparon no monte Xéfer.

²⁴ Partiron do monte Xéfer e acamparon en Haradah.

²⁵ Partiron de Haradah e acamparon en Maquelot.

²⁶ Partiron de Maquelot e acamparon en Táhat.

²⁷ Partiron de Táhat e acamparon en Térah.

²⁸ Partiron de Térah e acamparon en Mitcah.

²⁹ Partiron de Mitcah e acamparon en Hasmonah.

³⁰ Partiron de Hasmonah e acamparon en Moserot.

³¹ Partiron de Moserot, e acamparon en Bene-Iacán.

³² Partiron de Bene-Iacán e acamparon en Hor-ha-Guidgad.

³³ Partiron de Hor-ha-Guidgad e acamparon en Iotbatah.

³⁴ Partiron de Iotbatah, e acamparon en Abronah.

³⁵ Partiron de Abronah, e acamparon en Esion-Guéber.

³⁶ Partiron de Esion-Guéber e acamparon no deserto de Sin, isto é, Cadex.

³⁷ Partiron de Cadex e acamparon no monte Hor, na fronteira do país de Edom.

³⁸ O sacerdote Aharón subiu ó monte Hor por orde do Señor e alí morreu o ano corenta da saída dos fillos de Israel do país de Exipto, no mes quinto, a primeiros do mes.

³⁹ Aharón tiña cento vintetrés anos cando morreu sobre o monte Hor.

⁴⁰ Entón tivo noticia o rei cananeo de Arad, que moraba no Négueb, no país de Canaán, da chegada dos fillos de Israel.

⁴¹ Partiron do monte Hor e acamparon en Salmonah.

⁴² Partiron de Salmonah e acamparon en Funón.

⁴³ Partiron de Funón e acamparon en Obot.

⁴⁴ Partiron de Obot e acamparon en Lie-ha-Abarim, fronteira de Moab.

⁴⁵ Partiron de Lie-ha-Abarim, e acamparon en Dibon-Gad.

⁴⁶ Partiron de Dibon-Gad e acamparon en Almon-diblataim.

⁴⁷ Partiron de Almon-diblataim e acamparon nos montes de Abarim, de fronte de Nebó.

⁴⁸ Partiron dos montes de Abarim e acamparon nas planicies de Moab, xunto ó Xordán, de fronte de Iericó.

⁴⁹ Acamparon xunto ó Xordán desde Bet-ha-Ieximot ata Abel-ha-Xitim, nas planicies de Moab.

⁵⁰ O Señor díxolle a Moisés nas planicies de Moab, onda o Xordán, de fronte de Iericó:

⁵¹ —"Fálalles ós fillos de Israel: Cando pasedes o Xordán cara ó país de Canaán,

⁵² expulsaredes de diante de vós a todos os habitantes do país; destruiredes todas as súas pedras esculpidas e todas as súas estatuas de metal fundido, e derrubaredes todos os seus altares.

⁵³ Tomaredes posesión do país e habitarédelo; a vós douvos o país como herdanza.

⁵⁴ Repartiredes o país por sorte, segundo as vosas familias: ó máis numeroso darédeslle herdade maior, e ó máis pequeno darédeslle unha herdanza máis pequena. Aquilo que lle toque en sorte a cada un, seu será; collerédelo en propiedade segundo as vosas tribos paternas.

⁵⁵ Pero se non expulsades de diante de vós ós moradores do país, acontecerá que os que deles ficaren serán para vós como espiñas nos vosos ollos e como lanzas nas illargas, e hanvos perseguir na terra onde habitedes;

⁵⁶ e o que pensei facerlles a eles, faréivolo a vós".