Números 30 - Biblia SEPT

Os votos e promesas

¹ Moisés faloulles ós fillos de Israel conforme a todo o que lle ordenara o Señor.

² Moisés faloulles tamén ós xefes das tribos israelitas, dicindo: —"Isto é o que mandou o Señor:

³ Se un home fai un voto ó Señor ou se compromete baixo xuramento, uníndose por unha obrigación, non faltará á súa palabra; obrará conforme a todo o que prometeu.

⁴ Se unha muller fai un voto ó Señor ou se compromete por unha obrigación, estando na casa de seu pai, na súa mocidade,

⁵ e sabedor o pai do seu voto e do seu compromiso, el non di nada, todos os seus votos e todo o seu compromiso serán firmes.

⁶ Non obstante, se o seu pai, ó chegar ó coñecemento dos votos e do compromiso, se opón, todos os seus votos e mais o compromiso non terán valor, e o Señor perdoaraa, porque seu pai se opuxo a isto.

⁷ Se se casa estando suxeita ós seus votos ou a algunha promesa, que a obriga a algunha privación,

⁸ e se o seu home chega a coñecer iso e non lle di nada, os seus votos serán firmes e serán firmes os seus compromisos.

⁹ Pero, se o home, no día en que dixo chegar ó coñecemento diso, o desaproba, o voto queda anulado e a promesa feita de palabra, coa que se comprometera, desaparece, e o Señor perdoaraa.

¹⁰ En troques, o voto dunha viúva ou dunha muller repudiada e todos os seus compromisos serán firmes para ela.

¹¹ Se unha muller fixo un voto ou promesa, con xuramento de se privar de algo, estando na casa do marido,

¹² e o marido, que chega a sabelo, non lle di nada, nin desaproba o feito, todos os seus votos quedarán en firme, e tamén serán firmes todos os seus compromisos.

¹³ Con todo, se o seu marido, o día no que o saiba, o anula, nada de todo canto saíu dos labios dela, sexan votos ou compromisos, será firme; o seu marido anulounos, e o Señor perdoaraa.

¹⁴ Todo voto e todo compromiso por xuramento de se mortificar poderao ratificar seu esposo ou anulalo.

¹⁵ Mais se o seu marido garda silencio ata o día seguinte, ratifica así todos os votos e todas as obrigacións que sobre ela pesen; confírmaos por gardar silencio o día no que o soubo.

¹⁶ Mais se el os anulase, despois de o saber, cargaría coa iniquidade dela".

¹⁷ Tales son os estatutos que o Señor prescribiu a Moisés sobre relacións entre marido e muller, e tamén entre un pai e mais a súa filla, durante a mocidade desta na casa de seu pai.