Nehemías 3 - Biblia SEPT

Reparación dos muros de Xerusalén

¹ Eliaxib, o sumo sacerdote, levantouse, xuntamente cos seus irmáns, os sacerdotes, e construíron a porta das Ovellas. Consagrárona e puxéronlle as follas; despois consagraron a muralla ata a torre dos Cento, ata a torre de Hananel.

² O seu lado construíron os homes de Iericó e ó lado construíu Zacur, fillo de Imrí.

³ Os fillos do Senaah fixeron a porta dos Peixes e foron tamén eles os que a colocaron e fixaron as súas follas, trancas e ferrollos.

⁴ De seguido traballou Meremot, fillo de Urías, fillo de Hacós, e ó seu lado traballou Mexulam, fillo de Berequías, fillo de Mexezabel; xunto del traballou Sadoc, fillo de Baná;

⁵ ó seu lado traballaron os de Tecoa, pero os seus notables non se sumaron ó servzo dos seus señores.

⁶ Ioiadá, fillo de Paséah, e Mexulam, fillo de Besodía, traballaron na porta do arrabalde novo; foron eles os que fixaron as súas follas, trancas e ferrollos.

⁷ O seu lado traballou Melatías o gabaonita, e tamén Iadón o meronotita, os homes de Gabaón e de Mispah, dependentes do solio do gobernador de Transeufratina.

⁸ O seu lado traballou Uziel, fillo de Harhaías o ourive, e ó seu lado traballou Hananías o perfumista. Fóronse de Xerusalén unha vez rematada a muralla longa.

⁹ Canda eles traballou Refaías, fillo de Hur, xefe da metade do distrito de Xerusalén.

¹⁰ A continuación traballou Iedaías, fillo de Harumaf, fronte da súa casa, e ó seu lado traballou Hatux, fillo de Haxafnías.

¹¹ Na segunda porción traballou Malaquías, fillo de Harim, como tamén Haxub, fillo de Pahat—Moab; o mesmo que na torre dos Fornos.

¹² O seu lado traballou Xalum, fillo deo Lohex, xefe da metade dun sector de Xerusalén, el e as súas fillas.

¹³ Na porta do Val traballou Hanún cos habitantes de Zanóah; foron eles os que a fixeron, aseguraron as súas follas, coas barras e fechos, e reconstruíron cincocentos metros de muralla ata a porta do Esterco.

¹⁴ A porta do Esterco restaurárona Malaquías, fillo de Recab, xefe do distrito do Casalhorto; foi el quen a construíu, fixando as súas follas, trancas e fechos.

¹⁵ Xalum, fillo de Kol—Hozeh, xefe do sector de Mispah, traballou na porta da Fonte; foi el quen a fixo, cubriuna e púxolle as follas, trancas e ferrollos; tamén construíu a muralla do estanque de Xélah, onda o xardín real, ata a esqueira que baixa da Cidade de David.

¹⁶ Despois del traballou Nehemías, fillo de Azbuc, xefe de medio distrito de Caspena, ata as tumbas de David, o estanque artificial e a casa dos Valentes.

¹⁷ O seu lado traballaron os levitas: Rehúm, fillo de Baní e, a par del, traballou no seu propio distrito Haxvías, xefe da metade do sector de Queilah:

¹⁸ Despois del traballaron os seus irmáns Binuí, fillo de Henadad, xefe da metade do sector de Queilah.

¹⁹ O seu lado traballou Ézer, fillo de Iexúa, xefe de Mispah, nunha segunda porción, a partir do sitio que cae fronte á subida do arsenal, no ángulo.

²⁰ Despois del traballou con gran coraxe Baruc, fillo de Zabai, nunha segunda porción, a partir do ángulo ata a entrada da casa de Eliaxib, o sumo sacerdote.

²¹ Despois del traballou Meremot, fillo de Uría, fillo de Hacós, nunha segunda porción, a partir da entrada da casa de Eliaxib ata o extremo da casa de Eliaxib.

²² E despois del traballaron os sacerdotes, chegados dos contornos.

²³ Despois traballou Benxamín e tamén Haxub, diante da súa casa; despois traballou Azarías, fillo de Maseías, fillo de Anasías, ó lado da súa casa.

²⁴ Despois del traballou Binuí, fillo de Henadad, nunha segunda porción, a partir da casa de Azarías ata o recanto e ata o ángulo;

²⁵ Palal, fillo de Uzai, continuou a partir do ángulo e a torre superior do palacio real, a alta, a que dá ó patín do cárcere. A par del, Pedaías, fillo de Parox, restaurou

²⁶ Ata a porta das Augas, ó leste da torre superior.

²⁷ Despois del traballaron os de Tecoa, nunha segunda porción, a partir do lugar que está diante da torre superior, ata a muralla do Ofel.

²⁸ Despois da parte alta da porta dos Cabalos traballaron os sacerdotes, cada un diante da súa casa.

²⁹ A continuación traballou Sadoc, fillo de Imer, diante da súa casa, e despois del traballou Xemaías, fillo de Xecanías, gardián da porta do Leste.

³⁰ Despois del traballou Hananías, fillo de Xelemías, e tamén Hanún, fillo de Salaf o sexto, nunha segunda porción. A continuación traballou Mexulam, fillo de Berequías, diante da súa morada.

³¹ Despois del traballou Malaquías o ourive ata a casa dos servidores e dos comerciantes, fronte á porta de Mifcad ata a cela alta do ángulo.

³² Entre a cela alta do ángulo e a porta das Ovellas traballaron os ourives e os comerciantes.

Os inimigos opóñense á reconstrución

³³ Cando Sambalat soubo que nós levantabamos a muralla, encheuse de cólera e de furor. Burlouse dos xudeus

³⁴ e falou na presenza dos seus irmáns e das tropas de Samaría, dicindo: —"Que fan eses infelices? Déixaselles traballar? Van ofrecer sacrificios? Van terminar hoxe? Farán revivir as pedras de entre os pardiñeiros, agora que xa están calcinadas?"

³⁵ O amonita Tobías estaba ó seu lado e dixo: —"Eles constrúen, mais, en canto suba unha raposa á súa muralla de pedra, fará nela unha fenda".

³⁶ Escoita, Deus noso, como se burlan de nós. Fai caer os seus insultos sobre a súa cabeza e entrégaos ó desprezo nun país de catividade.

³⁷ Non perdoes a súa falta, e que o seu pecado non se borre diante de ti; porque cometeron unha ofensa contra os que constrúen.

³⁸ Reconstruímos, pois, a muralla, e toda ela foi reparada ata media altura. O pobo tomou moi a peito o facela.