Miqueas 3 - Biblia SEPT

Contra os dirixentes de Israel que oprimen o pobo

¹ Entón, eu dixen: "Escoitade, xefes de Xacob; vós, dirixentes da casa de Israel: Non é cousa vosa o coñecer o dereito?

² Vós, que odiades o ben e amades o mal? Vós, que lles arrincades a pel, e tirades a carne dos seus ósos?

³ Si, certo, comen a carne do meu pobo, e arríncanlles a súa pel. Rómpenlles en anacos os ósos, para os poñer coma a carne no pote, coma vianda no medio da cazola.

⁴ Entón clamarán ó Señor, pero non lles responderá; ocultaralles o seu rostro naquela hora, xa que cometeron crimes cos seus feitos".

Contra os profetas que explotan a súa misión

⁵ Así fala o Señor contra os profetas que desorientan o meu pobo, que claman: "paz", se morden algo cos dentes; pero proclaman guerra santa contra quen non lles pon algo na boca.

⁶ "Por isto, teredes noite en vez de visión, teredes que estar ás escuras en vez de adiviñar; o sol porase para estes profetas e o día volverase escuro sobre eles.

⁷ Os que teñen visións avergonzaranse, e os adiviños encheranse de vergonza. Todos eles taparán o bigote, pois Deus non lles dá ningunha resposta".

O profetismo de Miqueas

⁸ Pero eu grazas ó espírito do Señor estou cheo de forza, de sentencias de xuízo e de coraxe, para lle facer coñecer a Xacob a súa rebeldía, e a Israel o seu pecado.

Contra todos os dirixentes de Xudá

⁹ Escoitade, pois, isto, xefes de Xacob e dirixentes da casa de Israel, que volvedes abominable a sentencia xudicial, e facedes torto todo o que é dereito.

¹⁰ "Construídes Sión co sangue vertido e Xerusalén con perversidades.

¹¹ Os seus xefes emiten veredictos conforme ós regalos, os seus sacerdotes dan a lei por un prezo, e os seus profetas adiviñan por diñeiro, e ademais apóianse no Señor, dicindo: Non está o Señor no medio de nós? Ningunha desgraza nos acontecerá.

¹² Por isto, por culpa vosa, Sión será arado coma un campo, Xerusalén converterase en ruínas, e a montaña do templo un conxunto de outeiros a monte".