Mateo 20 - Biblia SEPT

¹ Porque o Reino dos Ceos parécese a un propietario que saíu pola mañá cedo a contratar xornaleiros para a súa viña.

² Axustou con eles o xornal dun denario e mandounos á súa viña.

³ Saíu outra vez á media mañá e atopou outros sen traballo na praza.

⁴ E díxolles: Ide vós tamén á miña viña, e dareivos o xusto.

⁵ Eles foron. De novo saíu polo mediodía, e pola tarde, facendo o mesmo.

⁶ Pero aínda volveu saír á tardiña, e atopando outros parados na rúa, díxolles: Pero, que facedes aquí, todo o día sen traballar?

⁷ Eles responderon: É que ninguén nos contratou. El díxolles entón: Ide vós tamén á miña viña.

⁸ Anoitecendo xa, díxolle o dono da viña ó administrador: Chama os xornaleiros e págalles o xornal: empézasme polos últimos e acabas polos primeiros.

⁹ Chegan os da derradeira hora e dálles un denario a cada un.

¹⁰ Cando chegaron os primeiros coidaron que lles darían máis, pero tamén recibiron cadanseu denario.

¹¹ O recibilo, murmuraban contra o propietario:

¹² Eses, os derradeiros, traballaron unha hora só e trátalos igual ca nós, que aturamos o peso e a caloraza do día.

¹³ Pero el replicoulle a un deles: Amigo, non che fago ningunha inxustiza. Non axustamos un denario?

¹⁴ Pois colle o teu, e vaite. E logo, se quero darlle ó último igual ca a ti,

¹⁵ non teño dereito a facer o que quero co que é meu? Ou é que ti ves con mal ollo que eu sexa bo?

¹⁶ Así, dese mesmo xeito, os últimos serán os primeiros, e os primeiros serán os últimos.

Terceiro anuncio da paixón (Mc 10, 32-34; Lc 18, 31-34)

¹⁷ Segundo ía subindo a Xerusalén, chamou a un lado os Doce polo camiño e díxolles:

¹⁸ Vede que subimos a Xerusalén, e que alí lles van entregar o Fillo do Home ós sumos sacerdotes e mais ós letrados; condenarano a morte,

¹⁹ e entregarano ós pagáns para que fagan riso del, o azouten e o crucifiquen; pero ó terceiro día resucitará.

Petición de Santiago e Xoán (Mc 10, 35-45)

²⁰ Entón achegóuselle a nai dos fillos do Zebedeo cos seus fillos, prostrándose para pedirlle algo.

²¹ El preguntoulle: Que queres? Respondeulle: Manda que estes dous fillos meus senten un á túa dereita e outro á túa esquerda no teu Reino.

²² Respondeulle Xesús: Non sabedes o que pedides. Poderedes beber o cáliz que eu teño que beber? Respondéronlle: Podemos.

²³ Xesús replicou: O meu cáliz beberédelo; pero o sentar á miña dereita ou á miña esquerda, iso non depende de min concedelo: é para quen o meu Pai o ten preparado.

²⁴ O escoitaren isto os outros dez, anoxáronse todos cos dous irmáns.

²⁵ Entón Xesús chamou por eles e díxolles: Xa sabedes que os xefes dos pobos os tiranizan, e os poderosos os asoballan.

²⁶ Pero entre vós non pode ser así. Nin moito menos: quen queira ser importante, que sirva ós demais;

²⁷ e quen queira ser o primeiro, que sexa o máis servizal;

²⁸ porque o Fillo do Home non veu a que o sirvan, senón a servir e a entregar a súa vida en rescate por todos.

Cura a dous cegos (Mc 10, 46-52; Lc 18, 35-43)

²⁹ E ó saíren de Xericó, seguiuno moita xente.

³⁰ Sentados a carón do camiño, había dous cegos que, cando oíron que pasaba Xesús, puxéronse a berrar: Fillo de David, ten piedade de nós!

³¹ A xente rifáballes para que calasen, pero eles berraban aínda máis alto: Señor, Fillo de David, ten piedade de nós!

³² Xesús parou, chamounos e preguntoulles: Que queredes que vos faga?

³³ Eles responderon: Señor, que se nos abran os ollos.

³⁴ Compadecido Xesús, tocoulles os ollos, e de contado recobraron a vista; e foron tras el.