Mateo 1 - Biblia SEPT

NACEMENTO E INFANCIA DE XESÚS Xenealoxía de Xesús (Lc 3, 23-38)

¹ Libro da xenealoxía de Xesús Cristo, fillo de David, fillo de Abraham.

² Abraham xerou a Isaac. Isaac xerou a Xacob. Xacob xerou a Xudá e mais os seus irmáns.

³ Xudá, de Tamar, xerou a Peres e mais a Zarán. Peres xerou a Esrón. Esrón xerou a Arán.

⁴ Arán xerou a Aminadab. Aminadab xerou a Naasón. Naasón xerou a Salmón.

⁵ Salmón, de Rahab, xerou a Booz. Booz, de Rut, xerou a Obed. Obed xerou a Iexé.

⁶ Iexé xerou ó rei David. David, da que foi muller de Urías, xerou a Salomón.

⁷ Salomón xerou a Roboam. Roboam xerou a Abías. Abías xerou a Asá.

⁸ Asá xerou a Ioxafat. Ioxafat xerou a Ioram. Ioram xerou a Ozías.

⁹ Ozías xerou a Ioatán. Ioatán xerou a Acaz. Acaz xerou a Ezequías.

¹⁰ Ezequías xerou a Menaxés. Menaxés xerou a Amón. Amón xerou a Ioxías.

¹¹ Ioxías xerou a Ieconías e mais os seus irmáns, en tempos da deportación a Babilonia.

¹² Despois da deportación a Babilonia, Ieconías xerou a Xealtiel. Xealtiel xerou a Zerubabel.

¹³ Zerubabel xerou a Abiud. Abiud xerou a Eliaquim. Eliaquim xerou a Asor.

¹⁴ Asor xerou a Sadoc. Sadoc xerou a Aquim. Aquim xerou a Eliud.

¹⁵ Eliud xerou a Elazar. Elazar xerou a Matán. Matán xerou a Xacob.

¹⁶ Xacob xerou a Xosé, esposo de María, da que naceu Xesús, chamado Cristo.

¹⁷ Foron, logo, catorce as xeracións desde Abraham ata David, catorce tamén desde David ata a deportación de Babilonia, e catorce desde a deportación de Babilonia ata Cristo.

Nacemento de Xesús (Lc 1, 27-35; 2, 1-7)

¹⁸ O nacemento de Xesús Cristo foi así: María, a súa nai, estaba prometida a Xosé; e antes de viviren xuntos apareceu ela embarazada por obra do Espírito Santo.

¹⁹ Xosé, o seu prometido, home xusto, non a querendo aldraxar, decidiu repudiala secretamente.

²⁰ Tal era a súa resolución, cando o anxo do Señor se lle apareceu en soños, dicíndolle: Xosé, fillo de David, non repares en levar contigo a María, a túa prometida; que o que nela se concibiu é obra do Espírito Santo.

²¹ Dará a luz un fillo, e ti poñeraslle de nome Xesús, porque salvará o seu pobo de todos os seus pecados.

²² Todo isto aconteceu para que se cumprise o que dixera o Señor por boca do profeta:

²³ Mirade: a virxe concibirá e dará a luz un fillo, e poñeranlle de nome Emmanuel (que quere dicir "Deus connosco").

²⁴ Acordou Xosé do seu soño, e fixo tal como lle mandara o anxo do Señor, levando consigo a súa prometida;

²⁵ e sen que a tocase, ela deu a luz un fillo. E el púxolle de nome Xesús.