Levítico 21 - Biblia SEPT

Santidade dos sacerdotes

¹ Díxolle o Señor a Moisés: —"Fálalles ós sacerdotes, fillos de Aharón e dilles: Que ninguén se contamine co cadáver dun conveciño,

² Agás o dun parente moi achegado a el, coma o da nai, o do pai, o dun fillo, o dunha filla, o dun irmán

³ e o dunha irmá, que se mantiña virxe sen se ter xuntado con ningún home; do contrario, mesmo por ela se podería facer impuro.

⁴ Un marido non se poderá facer impuro por mor dos seus parentes, profanándose.

⁵ Non raparán a cabeza, nin afeitarán a barba polos lados, nin farán incisións no seu corpo.

⁶ Serán santos para o seu Deus, non profanando o seu nome, porque son eles os que presentan sacrificios de holocausto ó Señor, alimento do seu Deus: deberán ser santos.

⁷ Non casarán con muller prostituída ou deshonrada ou repudiada polo seu home, porque están consagrados ó seu Deus.

⁸ E ti recoñeceralo como santo, pois ofrece o alimento do teu Deus: será para ti santo, porque santo son eu, que vos santifico.

⁹ Se a filla dun sacerdote se fai prostituta, é unha deshonra para seu pai, será queimada no lume.

¹⁰ O sumo sacerdote, escolleito de entre os seus irmáns, a quen se lle verteu sobre a cabeza o óleo da unción e se lle deu o poder para vestir os ornamentos sagrados, non desenguedellará os cabelos da cabeza nin rachará os seus vestidos.

¹¹ Non se achegará a ningún morto, nin sequera a seu pai ou súa nai, para non se facer impuro.

¹² Non sairá do santuario do seu Deus, porque leva na súa testa a coroa do óleo da unción do seu Deus. Eu son o Señor.

¹³ Collerá por muller unha virxe.

¹⁴ Non poderá coller por muller nin viúva, nin repudiada, nin deshonrada, nin prostituta, senón que casará cunha moza virxe do seu pobo.

¹⁵ Non fará impura a súa descendencia no medio do seu pobo, porque eu son o Señor que o santifico".

¹⁶ O Señor faloulle a Moisés:

¹⁷ —"Fálalle a Aharón e dille: Ninguén da túa xente nas vindeiras xeracións, que teña algunha eiva, se poderá aproximar para ofrecer o alimento do seu Deus:

¹⁸ non se aproximará ningún home que teña algunha eiva, poño por caso, sendo cego ou coxo ou manco ou malfeito.

¹⁹ Calquera que teña un pé ou unha man crebados,

²⁰ ou teña eiva ou sexa vesgo ou anano ou sarnoso ou tiñoso ou eunuco.

²¹ Ninguén da parentela do sacerdote Aharón, que teña algunha eiva, se poderá aproximar para ofrecer un holocausto ó Señor: habendo unha eiva nel non se pode aproximar para ofrecer o alimento do seu Deus.

²² Poderá comer do alimento do seu Deus, das ofrendas santísimas e das santas;

²³ pero non entrará alén do veo nin se achegará ó altar, porque ten unha eiva, e non debe profanar o meu santuario, pois eu son o Señor, que os santifico".

²⁴ Moisés díxolles isto a Aharón e ós seus fillos e a todos os israelitas.