Levítico 18 - Biblia SEPT

Honestidade da vida matrimonial

¹ Faloulle o Señor a Moisés:

² —"Fálalles ós fillos de Israel e dilles: Eu son o Señor, o voso Deus.

³ Non vos comportedes conforme os costumes de Exipto, onde morastes, nin vos afagades ós costumes de Canaán, onde eu vos vou facer entrar, nin vos guiedes alí polas súas leis.

⁴ Obedeceredes os meus mandamentos, e cumpriredes os meus estatutos, acomodándovos a eles. Eu son o Señor, o voso Deus.

⁵ Aprenderedes os meus decretos e gardaredes os meus estatutos, e viviredes neles cada un de vós. Eu son o Señor.

⁶ Ningún de vós se achegará a ningunha persoa consanguínea para lle descubrir a súa nudez. Eu son o Señor.

⁷ Non descubrirás a nudez do teu pai nin a da túa nai; pois ela é túa nai, non descubrirás a súa nudez.

⁸ Non descubrirás la nudez da muller do teu pai, pois é a nudez de teu pai.

⁹ Non descubrirás a nudez da túa irmá, filla do teu pai ou de túa nai; sexa nacida na casa, ou fóra dela, non descubrirás a súa nudez.

¹⁰ Non descubrirás s nudez da filla do teu fillo, nin a da filla da túa filla, pois é a túa propia nudez.

¹¹ Non descubrirás la nudez da filla dunha muller de teu pai, xerada polo teu pai: ela é túa irmá.

¹² Non descubrirás a nudez da irmá de teu pai: ela é carne do teu pai.

¹³ Non descubrirás a nudez da irmá da túa nai: ela é carne da túa nai.

¹⁴ Non descubrirás a nudez do irmán de teu pai, é dicir, non te achegarás á muller del: ela é túa tía.

¹⁵ Non descubrirás a nudez da túa nora: é a muller do teu fillo; de ningún xeito descubrirás a súa nudez.

¹⁶ Non descubrirás a nudez da muller do teu irmán: é a nudez do teu irmán.

¹⁷ Non descubrirás a nudez dunha muller e da súa filla; nin lle collerás a filla dun fillo seu, nin a dunha filla súa, para descubrir a súa nudez, pois son do seu sangue. Sería unha infamia.

¹⁸ Non collerás a irmá da túa muller, pois faríala a súa rival; nin lle descubrirás a súa nudez mentres viva a túa muller.

¹⁹ Non te achegarás a ningunha muller nos días da súa menstruación, para lle descubrir a súa nudez.

²⁰ Non te deitarás coa muller do teu próximo: faríaste impuro con ela.

²¹ Non permitirás que ningún dos teus descendentes adore a Molok, manchando o nome do teu Deus. Eu son o Señor.

²² Non te deitarás con ningún home, coma se fose muller: é unha abominación.

²³ Non terás trato sexual con ningún animal: faríaste impuro con el. Ningunha muller se porá diante dun animal para se emparellar con el: é unha perversidade.

²⁴ Non vos contaminaredes con ningunha destas cousas, pois con todas estas cousas se contaminaron as xentes que vou expulsar eu de diante de vós.

²⁵ Por teren contaminado o país, determinei castigar o seu pecado, de tal sorte que a mesma terra foi a que vomitou ós seus habitantes.

²⁶ Vós gardaredes os meus mandamentos e os meus estatutos, e non faredes ningunha destas abominacións: nin os nativos nin os estranxeiros, que moran no medio de vós.

²⁷ Pois todas estas abominacións cometeron os homes deste país, que tendes diante de vós, e contaminaron a terra.

²⁸ Que non vos teña que vomitar esta terra por contaminala, como vomitou as xentes que a habitaron antes ca vós.

²⁹ Calquera que cometa algunha destas abominacións será exterminado do medio do meu pobo, por facer tal cousa.

³⁰ Obedeceredes o que vos mando e xamais non faredes cousa contraria ós meus estatutos verbo das abominacións que se cometeron antes de vós, e non vos contaminaredes con elas. Eu son o Señor o voso Deus".