XOB - A Biblia Galega (Ed. SEPT) 8 - Biblia SEPT

Bildad

¹ Pola súa parte díxolle Bildad o xuhíta.

² —"Ata cando falarás deste xeito e van ser as túas razóns un vento arroutado?

³ Ia Deus torcer o dereito? Pode o Omnipotente virar a xustiza?

⁴ Se os teus fillos pecaron contra El, xa os deixou na man do seu crime.

⁵ Mais se ti voltas cedo a Deus e se lle rogas mercé ó Omnipotente,

⁶ se estás limpo e es xusto, velará El sobre ti, restaurará o casal ó que tes dereito.

⁷ Daquela os teus comezos semellarán pequenos e o teu futuro medrará abondo.

⁸ E se non, inquíreo dos devanceiros e procura no que dexergaron seus pais;

⁹ pois nós somos de onte e non sabemos e os nosos días son coma a sombra no chan.

¹⁰ Pero eles ensinaranche e contaranche, farán xurdir da súa sabenza as palabras.

¹¹ Xermola o papiro fóra do lameiro? Medra o vimbio sen auga?

¹² Aínda en gromo e sen cortar, antes doutras herbas esmorece.

¹³ Tal é o vieiro dos que esquecen a Deus tal se perde a esperanza dun malvado.

¹⁴ A súa confianza está posta no po e a súa esperanza nun fío de araña.

¹⁵ Afíncase na súa casa, e non se ten en pé; aférrase nela, e non se mantén.

¹⁶ Móstrase cheo de zume cara ó sol, bota bacelos polo seu horto;

¹⁷ enreda as raigañas polas pedras, apóiase nas rochas.

¹⁸ Pero se o arrincan do seu posto, este renega del dicindo: Non o vin xamais.

¹⁹ Tal é o remate do seu ledo camiño, e outra planta vén xermolar na terra.

²⁰ De xeito que Deus non refuga o íntegro, como non aferra tampouco a man dos impíos.

²¹ Pode El aínda encher os teus beizos de sorriso e os teus labios de aturuxos.

²² Daquela irán os teus inimigos cubertos de vergonza; ollas cara a tenda dos impíos, e esta esvaeceu".