XOB - A Biblia Galega (Ed. SEPT) 6 - Biblia SEPT

Xob (6-7)

¹ Resposta de Xob:

² —"Oxalá que se pesase a miña dor e se amoreasen as miñas mágoas na balanza!

³ Pesarían máis cás areas dos mares: por iso desvaría a miña lingua.

⁴ Pois levo en min as frechas do Poderoso e o meu ánimo bebe o seu veleno. Érguense contra min os terrores de Deus.

⁵ Ponse o burro a ornear cando ten herba? Ou brúa o boi diante do seu penso?

⁶ Quen xantará sen sal o manxar insulso? E que gusto ten o zume dunha herba?

⁷ Repúgnalle á miña gorxa nin sequera tocala pois é para min coma un xantar impuro.

⁸ Oh se chegase a porto a miña demanda e o Señor concedese aquilo no que espero!

⁹ Decídase por fin Deus a esnaquizarme, retire a man e tronce xa o meu fío!

¹⁰ Iso sería para min un consolo; reloucaría ledo a pesar desta dor sen piedade, pois non tería eu renegado das palabras do Santo.

¹¹ Que forzas teño xa para me soster? Cal será o meu remate, para eu ter folgos?

¹² Teño por caso a dureza dos penedos? Son de bronce as miñas carnes?

¹³ Nada hai en min que me poida axudar cando é a mesma sorte a que me foxe.

¹⁴ Un home non lle nega a boa lei ó seu amigo nin refuga o temor do Omnipotente!

¹⁵ Mais os meus irmáns traizoáronme coma a enxurrada, coma os regueiros cando rebordan a canle,

¹⁶ baixando revoltos coa xeada cando neles se fundiu a neve;

¹⁷ pero que desaparecen no tempo da seca, e en canto chega a calor, enxoito queda o seu leito.

¹⁸ Torcen as caravanas a súa rota, pérdense no deserto e perecen;

¹⁹ As caravanas de Temán procúranos, contan con eles os beduínos de Sabá;

²⁰ confundidos pola longa espera chegan alí, e atópanse enganados.

²¹ Deste xeito fostes vós para min, ollastes o espanto e deuvos medo.

²² Pedinvos eu que me deades nada ou que paguedes suborno do voso peculio,

²³ ou que me libredes do meu inimigo, ou me rescatedes da forza dos tiranos?

²⁴ Ensinádeme vós, e eu calarei! Aclarádeme no que ande errado!

²⁵ Como non aceptar un discurso sincero? Pero que valor pode ter unha corrección da vosa boca?

²⁶ Estades aparellando verbas para aldraxar? Non contan as razóns dun home sen esperanza?

²⁷ Vós sodes capaces de botar sortes por un orfo e mesmo de relear por un veciño!

²⁸ Agora estade quedos e escoitádeme: Xuro que non vos estou mentindo na cara!

²⁹ Deixade a teima, non suceda outra desgraza! Abonda xa, que aínda está en xogo o meu dereito!

³⁰ Hai mala lei na miña lingua? Non distingue as razóns o meu padal?