XOB - A Biblia Galega (Ed. SEPT) 42 - Biblia SEPT

A derradeira resposta de Xob (40, 3-5; 42, 2-3 c.d. 5-6)

¹ Falou Xob respondéndolle a Iavé:

² —"Confeso que ti o podes todo e non hai designio que che sexa imposible.

³ Quen se arrisca a embazar un plan por ignorancia? Por iso, falaba eu sen tino de prodixios que non coñecía!

⁴ Escoita o que che vou dicir, preguntareiche para que ti me ensines.

⁵ Coñecíate eu de oídas, mais agora contémplante os meus ollos,

⁶ por iso retiro o dito e arrepíntome no po e na cinsa".

Epílogo

⁷ Despois de falar Iavé estas razóns con Xob, díxolle a Elifaz o temanita: —Férveme a ira contra ti e contra os teus dous amigos porque non falastes de min o que é debido, coma o meu servo Xob.

⁸ Collede logo sete vacas e sete carneiros e ide onda o meu servo Xob, para que os ofreza por vós en holocausto; e que o meu servo Xob pregue por vós, para que eu vos sexa propicio e non faga convosco un escarmento, porque non falastes de min o que era debido coma fixo o meu servo Xob.

⁹ Foron entón Elifaz o temanita, Bildad o xuhíta e Sofar o namateo e fixeron o que lles mandara Iavé, e El escoitou a Xob.

¹⁰ Iavé trocou a sorte de Xob cando intercedía polos seus amigos, e multiplicou polo dobre todo canto Xob puidera ter antes.

¹¹ Chegaron daquela todos os seus irmáns e as súas irmás e todos cantos o coñeceran antes, e comeron con el do pan da casa e déronlle o pésame, consolárono por todas as mágoas que Iavé lle impuxera, e déronlle cadansúa cantidade de diñeiro e aneis de ouro.

¹² Bendixo Iavé a fin da vida de Xob máis aínda cós comezos, e chegou a ter catorce mil ovellas, seis mil camelos, mil xugadas de bois e mil asnas.

¹³ Tivo sete fillos e tres fillas.

¹⁴ Chamoulle á primeira "Rula", a segunda "Flor de Camela" e á terceira "Pomo de aromas".

¹⁵ Non houbo en toda a bisbarra mulleres tan belidas coma as fillas de Xob, e o pai deulles herdanza coma a seus irmáns.

¹⁶ Aínda viviu Xob cento corenta anos despois destes sucesos, e viu os seus fillos, os seus netos e os seus bisnetos.

¹⁷ E morreu Xob vello e farto de vida.