XOB - A Biblia Galega (Ed. SEPT) 41 - Biblia SEPT

¹ O que del se fía engánase, xa dunha ollada queda un derrubado;

² ninguén hai tan cruel cando o encirran; quen lle fará fronte?

³ Quen bateu con el, e saíu salvo? Nin o primeiro baixo o ceo!

⁴ Ninguén acalará o seu poder nin a forza vital que é a súa defensa.

⁵ Quen lle abriu o seu manto exterior ou traspasou a súa dobre coiraza?

⁶ Quen espalancou as portas dos seus beizos rodeadas de dentes estarrecedores?

⁷ O seu lombo ten ringleiras de placas seladas con remaches de pedernal,

⁸ unha a unha encaixadas; nin o aire pasa por entre elas,

⁹ Apéganse as unhas ás outras, tan trabadas que non se poden separar.

¹⁰ O seu esbirro solta faíscas de lume, os seus ollos son coma as pálpebras do abrente.

¹¹ Do fociño sáltanlle muxicas, xorden faíscas de lume;

¹² do seu nariz sae fume coma dun crisol aceso e fervente;

¹³ o seu bafo consome brasas, chóutanlle labaradas do fociño.

¹⁴ A forza resídelle no pescozo; diante del baila o medo;

¹⁵ ten carnes ben trabadas, fundidas nel, e non remexen.

¹⁶ O corazón é sólido coma un croio, dunha peza, coma pedra de moer.

¹⁷ Cando el se ergue, tremen os fortes, devalan coma a marea.

¹⁸ A espada do que o atope non resistirá, nin lanza, nin dardo, nin frecha,

¹⁹ pois para el o ferro é palla e o bronce, madeira podre.

²⁰ Non o axota unha frecha, e as pedras da fonda son para el coma lixos.

²¹ Para el a maza é estopa, e rise do asubío da azagaia.

²² O seu ventre son tellas afiadas que coma grade de ferro fan regueiros na lama.

²³ Fai ferver coma un pote os fondos, deixa o mar coma un botafumeiro;

²⁴ tras el fai lucir un ronsel, e imaxinas que o mar ten unha cabeleira branca.

²⁵ Non hai no mundo quen se lle semelle, alguén coma el, creado sen medo de nada.

²⁶ Fai fronte a canto haxa de elevado; el é o rei de todas as feras".