XOB - A Biblia Galega (Ed. SEPT) 40 - Biblia SEPT

Conclusión do discurso de Deus (40, 2. 8-14)

¹ Engadiu Iavé falando con Xob:

² —"Quere porfiar o censor do Omnipotente? O que corrixe a Deus, que lle responda!"

³ Respondeulle Xob:

⁴ —"Eu son un home feble, que che hei responder? porei a miña man sobre a boca.

⁵ Xa falei unha vez, non replicarei; dúas veces, nada engadirei".

⁶ Respondeu Iavé a Xob desde o trebón:

⁷ —"Cingue os teus lombos coma un home; vouche preguntar para que ti me ensines:

⁸ Vas en verdade anular o meu dereito? Declárasme culpable para saíres ti inocente?

⁹ Tes ti un brazo coma o de Deus ou atrona a túa voz coma a súa?

¹⁰ Anda, vístete de gloria e maxestade, envólvete nun esplendor glorioso!

¹¹ Derrama a furia da túa carraxe, bota unha ollada ós soberbios e abáteos!

¹² Olla para os fachendosos e humíllaos, esnaquiza os impíos onde estean,

¹³ Afúndeos todos a eito no po, encadéaos no máis oculto!

¹⁴ Entón tamén eu te hei loar: De certo que a túa dereita che deu o triunfo!

Instrución das bestas monstruosas (40, 15 - 41, 26)

¹⁵ Mais olla para o hipopótamo, a quen eu fixen igual ca ti; pace na herba coma os bois;

¹⁶ pero observa a forza dos seus lombos, a potencia nos músculos do seu ventre.

¹⁷ Ergue o rabo coma un cedro, os tendóns das súas coxas entretécense;

¹⁸ ten os ósos coma tubos de bronce, articulacións coma varas de ferro:

¹⁹ é do mellor que Deus produciu, só o creador pode aplicarlle a espada.

²⁰ Apórtanlle o seu xantar os montes, onde brincan as feras montesías;

²¹ déitase entre os xuncos, acochado nos caneiros dos pantanos;

²² os lotos fanlle sombra, rodéano os salgueiros do regato.

²³ Por máis que o río veña cheo, non se turba, fica confiado aínda que o Xordán lle chegue ós fociños.

²⁴ Quen poderá amarralo de fronte ou furarlle o nariz por máis que estea no cepo?

²⁵ Podes pescar co anzol o crocodilo ou atalo da lingua cunha corda?

²⁶ Podes pasarlle polo nariz unha liña ou perforarlle a queixada cun gancho?

²⁷ Virá onda ti suplicarche ou falarche con lingua agarimosa?

²⁸ Fará trato contigo, para que o recibas coma servo perpetuo?

²⁹ Podes xogar con el coma cun paxaro ou deixarásllelo atado ás túas nenas?

³⁰ Fará comercio del o gremio dos pescadores, poxarano entre os mercadores?

³¹ Ferirías de dardos o seu coiro ou a súa cabeza con arpóns?

³² Ponlle a túa man enriba: pensa ben na pelexa, e non o farás dúas veces!