XOB - A Biblia Galega (Ed. SEPT) 39 - Biblia SEPT

¹ Sabes ti cando pare a cabra montesa? Puideches observar a cerva nas súas dores?

² Contácheslles os meses de preñez? Sabes cando lles vén o intre do parto?

³ Dóbranse, dan saída ós seus fillos e libéranse das crías.

⁴ Os pequenos collen forzas e medran, foxen e xa non volven.

⁵ Quen deixou ceibe ó asno salvaxe, quen lle soltou as cinchas ó onagro,

⁶ A quen lle dei por eido a estepa por morada as chairas salitrosas?

⁷ Rise do xentío da cidade, non ten que oír os berros do arrieiro;

⁸ esculca os montes á procura do pasto, procura o verde onde queira que estea.

⁹ Vaite querer servir o touro bravo? Pasará a noite no teu cortello?

¹⁰ Manteralo da corda no teu suco? Vai el arar as eiras tras de ti?

¹¹ Fíaste del porque ten moita forza e descargas nel o teu traballo?

¹² Confías en que torne para recoller o gran da túa eira?

¹³ As ás da avestruz baten á présa, aínda que non teñan plumas coma a cegoña,

¹⁴ cando deixa polo chan os ovos a quecer entre o po

¹⁵ e non coida que un pé os pode esmagar ou tripar neles unha fera salvaxe.

¹⁶ É cruel cos seus fillos, como se non fosen dela, non lle importa ter sufrido de balde,

¹⁷ xa que Deus lle tolleu a Sabedoría e non lle deu parte na intelixencia.

¹⁸ Mais cando ergue o voo, burla a cabalo e cabaleiro.

¹⁹ Dáslle ti o brío ó cabalo? Revísteslle de crinas o pescozo?

²⁰ Ensínaslle a saltar coma a lagosta? O seu bufido fachendoso é abraiante!

²¹ Dá patadas de ledicia no chan e lánzase ó encontro das coirazas;

²² rise do medo, e ninguén o aterra, non dá volta ante a espada;

²³ por riba del sona a alxaba, a punta da lanza e mais o alfanxe;

²⁴ cun tremer de estrondo corre a terra, non se detén por máis que soe a trompa;

²⁵ cando escoita o clarín responde: ea! de lonxe venta a loita, o bruar dos xefes e o grito de guerra.

²⁶ Es ti quen lle ensina a voar ó falcón, tendendo as ás no vento do Sur?

²⁷ Remonta a aguia por orde túa, e coloca elevado o seu niño?

²⁸ Nas rochas vive e fai a morada, nos curutos das penas ten a súa atalaia;

²⁹ desde alí axexa a presa, os seus ollos pescudan desde lonxe;

³⁰ As súas crías arelan zugar o sangue, e onde haxa cadáveres, alí está".