XOB - A Biblia Galega (Ed. SEPT) 35 - Biblia SEPT

Discurso terceiro (33, 31-35 e 35, 2-16)

¹ Falou de novo Elihú:

² —"Coidas que es xusto ó dicires: Levo eu razón e non Deus?

³ E engades: Que proveito tiro eu? En que me axuda o non ter pecado?

⁴ Vouche responder eu coas miñas verbas, e ós teus amigos tamén.

⁵ Olla para o ceo e mira; fita as nubes tan altas por riba de ti!

⁶ Por máis que peques, que mal lle vas causar a El? Por moito que te rebeles, que lle vas facer?

⁷ Se es bo, que é o que lle dás ou que vai recibir da túa man?

⁸ Se a alguén danas, é a un home coma ti; e se fas xustiza, é a outro ser humano.

⁹ Hai quen se laia das moitas opresións e clama socorro ante a forza dos potentes;

¹⁰ pero ninguén di: Onde está o Deus que me creou, o que repón as forzas pola noite,

¹¹ que nos dá leccións coas bestas da campía e nos fai máis aleutos cós paxaros do ceo?

¹² Outros dan gritos, e ninguén responde diante da soberbia dos malvados.

¹³ Pero Deus non escoita a vaidade, o Omnipotente non se dá por sabedor.

¹⁴ Cando ti dis: Non me atende, xa ten presente o caso: Espera nel!

¹⁵ Mais agora, como a súa ira non castiga e non está El a coidar das transgresións,

¹⁶ Xob enche a boca con tolemias e amorea as súas verbas sen siso".