XOB - A Biblia Galega (Ed. SEPT) 26 - Biblia SEPT

Xob

¹ Deu Xob a súa resposta:

² —"Como poderás ti axudar ó feble, ou salvar os de brazos sen forzas?

³ Como é que aconsellas ós que non saben e lles mostras como van ter sorte en todo?

⁴ Quen che axudou a compor estas razóns? De quen é a inspiración que sae de ti?

⁵ Mesmo as ánimas tremen diante del por embaixo das augas e dos seus habitantes;

⁶ fica espido diante del o Xeol, non hai cuberta para o antro da Perdición.

⁷ El tendeu o Norte sobre o Baldeiro e pendurou a terra sobre a nada;

⁸ pechou cun atado a auga nas nubes, e non se racha con elas o nubeiro;

⁹ logo encubriu a face do luar botándolle por riba unha nube;

¹⁰ gravou o horizonte sobre as augas na fronteira entre a luz e as tebras;

¹¹ Abanean os piares do ceo espantados diante do seu berro;

¹² coa súa forza alporizou ó mar, coa súa habilidade destruíu a Rahab;

¹³ co seu vento varreu o ceo, coa súa man feriu a serpe fuxidía.

¹⁴ E isto non é máis cá ladeira do seu poder. Só é un pequeno murmurio o que del oímos. Quen entenderá o trebón do seu poder?"