XOB - A Biblia Galega (Ed. SEPT) 23 - Biblia SEPT

Xob

¹ Respondeu Xob:

² —"Tamén hoxe é rebelde a miña queixa pois a súa man fai pesado o meu xemido.

³ Oxalá soubese eu como o encontrar! Habíame achegar ata o seu trono,

⁴ para expor a miña causa diante del levando a boca chea de argumentos;

⁵ coñecería con que razóns responde, sabería o que me ten que dicir.

⁶ Levaría El adiante o preito pola forza? Non!, que me había de ter en conta.

⁷ Pois daquela sería un home honrado quen contende con El, gañaría eu de certo a causa para sempre.

⁸ Mais se torno para o leste, non o atopo; vólvome para o poñente, e non o albisco;

⁹ procúroo no norte, e non o vexo, vólvome cara ó sur e non o descubro.

¹⁰ Mais, dado que El coñece o camiño do meu lar, que me veña probar e hei saír coma o ouro:

¹¹ Mantívose o meu pé na súa pegada, gardei o seu vieiro sen torcerme,

¹² non me afastei da orde dos seus labios, no meu seo escondín a súa palabra.

¹³ Pero se El xa decidiu, quen é capaz de o cambiar? El fai todo canto lle agrada:

¹⁴ vai levar a cabo o que me decretou; deste xeito obra sempre.

¹⁵ Así fico eu diante del, estarrecido, e cando o penso, cóllolle medo.

¹⁶ Tal Deus amoléceme o ánimo túrbame o Omnipotente.

¹⁷ Pero non hei calar diante da escuridade, por máis que estea só e que me encubran as tebras.