XOB - A Biblia Galega (Ed. SEPT) 22 - Biblia SEPT

CICLO TERCEIRO DA DISPUTA (22-27) Elifaz

¹ Elifaz de Temán empezou a resposta:

² —"Vai poder un home beneficiar a Deus? Non! Só de si mesmo tira proveito o sabio.

³ Que vantaxe tira Deus de que ti sexas xusto? Que gaña con que ti te portes ben?

⁴ Iate el probar pola túa piedade, levarte a preito por iso?

⁵ Non é máis ben enorme a túa maldade e incontables as túas culpas?

⁶ Pois sen razón demandábaslles peñores ós teus irmáns e mesmo ós farrapentos lles arrincabas os vestidos.

⁷ Non dabas a beber auga ó sedento, e ó famento negábaslle o pan:

⁸ A terra é para os forzudos, quen recada honor, que viva nela!

⁹ As viúvas botáchelas fóra baleiras, e arruinaches os brazos dos orfos.

¹⁰ Por iso rodéanche as trampas, e o medo súbito asáltate,

¹¹ ou escurece e xa non podes ver e alágate o pulo da enxurrada.

¹² Non se alza Deus tanto coma o ceo? e olla para estrela do cénit, que é tan alta!

¹³ E, con todo, ti pensas: Que sabe Deus? Vai gobernar El por entre o nubeiro?

¹⁴ As nubes son o seu veo, por iso non ve; El fai a rolda pola órbita do ceo.

¹⁵ Queres seguir o vieiro antigo por onde calcaron os inicuos

¹⁶ que foron arrincados antes de tempo, cando a riada lles afundiu os alicerces?

¹⁷ Dicíanlle eles a Deus: Arreda de nós! Que nos pode valer o Omnipotente!

¹⁸ E fora El quen lles enchera ben de todo as casas, pero eles apartábano dos seus plans inicuos.

¹⁹ Ven isto os xustos e alégranse, fai burla deles o inocente:

²⁰ Abofé que esgotaron os seus haberes e o que quedaba devoróullelo o lume.

²¹ Ti axusta as contas e ten paz con El e dese xeito acadarás un bo pasar.

²² Ten por bo o ensino dos seus beizos! Toma a peito as súas palabras!

²³ Se te volves ó Omnipotente hate sandar. Afasta da túa tenda a inxustiza!

²⁴ Bota o teu ouro polo chan, o teu ouro de Ofir entre os callaos dos regatos!

²⁵ E que sexa o teu ouro o Omnipotente. El mesmo, as túas moreas de prata.

²⁶ Será entón o Omnipotente o teu folgar, erguerás diante de Deus o teu rostro.

²⁷ Cando lle rogues hate escoitar, e ti cumprirás os teus votos.

²⁸ Todo canto decidas hase realizar e o sol alumará nos teus camiños.

²⁹ Pois El rebaixa a arrogancia dos fachendosos mais axuda ós que humildes baixan os ollos,

³⁰ rescata ó home sen chata; por iso hate librar, se tes limpas as mans".