XOB - A Biblia Galega (Ed. SEPT) 19 - Biblia SEPT

Xob

¹ Respondeu Xob:

² —"Ata cando me estaredes a atormentar, a me esmagar con discursos?

³ Xa van dez veces que me asoballades, e non vos dá vergonza aldraxarme?

⁴ Aínda que de verdade ande errado, o erro vai comigo!

⁵ Non será que queredes avantaxarvos á miña conta acusándome por mor da miña desfeita?

⁶ Sabede que é Deus quen me fai dano, cinguíndome coa súa rede.

⁷ Berro inxustiza!, pero ninguén responde; pido axuda, pero non me fan xustiza.

⁸ Choeu o meu carreiro e non podo pasar, encheu de tebras o meu vieiro.

⁹ Espiume da gloria, arrincoume da cabeza a coroa.

¹⁰ Destruíu todo ó meu arredor, e teño que irme; fendeu coma unha árbore a miña esperanza.

¹¹ Acendeu a súa ira contra min e tenme por seu inimigo.

¹² Xúntanse as súas bandas para atacar: contra min enlousan a calzada, poñen o campo arredor da miña tenda.

¹³ Foxen de min os meus irmáns, os meus parentes trátanme coma alleo;

¹⁴ boto en falta veciños e coñecidos, esquézome dos que estaban ó meu cargo;

¹⁵ trátanme de forasteiro as miñas servas: óllanme cal se fose un estranxeiro.

¹⁶ Chamo ó meu escravo e non responde teño que lle rogar eu mesmo;

¹⁷ dálle noxo o meu alento á miña muller, fédolles ós meus irmáns;

¹⁸ mesmo os picariños me refugan e dan volta cando intento erguerme.

¹⁹ Os da serán abóuxanme, os benqueridos rexéitanme!

²⁰ Apégaseme a pel do corpo ós ósos, caen os meus dentes das enxivas.

²¹ Piedade, piedade, meus amigos, que a man de Deus me feriu!

²² Por que me perseguides coma Deus e non vos dades fartos na miña carne?

²³ Se algún día se escribisen as miñas palabras! Oxalá fixesen delas unha inscrición!

²⁴ Que con cicel e chumbo se labrasen para sempre nun penedo!

²⁵ Con todo, eu sei: o meu Liberador está vivo e ó remate hase erguer sobre a terra;

²⁶ despois de ter esgazada a miña pel, aínda sen carnes hei ver a Deus.

²⁷ Eu mesmo o hei ver; hano ver os meus ollos, non os doutro. Esmoréceme o corazón nas entrañas!

²⁸ E se teimades: Como o perseguiremos ou como poderiamos collerlle as voltas?

²⁹ Tende medo da espada! Pois estes son delitos dignos dela; e para que o saibades: hai un xuíz!"