Isaías 60 - Biblia SEPT

A glorificación escatolóxica de Xerusalén

¹ Levántate, brilla, que a túa luz xa chegou; si, a gloria do Señor resplandece sobre ti.

² Pois, olla, a escuridade encobre a terra e a negrura os pobos, pero sobre ti resplandece o Señor e a súa gloria faise ver sobre ti.

³ Certo que os pobos camiñarán coa túa luz e os reis co resplandor do teu alborexar.

⁴ Levanta os teus ollos arredor, todos estes xuntáronse, viñeron a ti. Os teus fillos veñen de lonxe e as túas fillas son traídas no colo.

⁵ Entón, cando o vexas, estarás radiante e o teu corazón latexará e ensanchará, pois as riquezas do mar traeránseche a ti e os bens dos pobos virán para ti.

⁶ Estarás cuberta dunha chea de camelos, de dromedarios novos de Madián e de Efah. Todos eles virán de Sabá. Virán cargados de ouro e incenso, e proclamarán ledos a loanza do Señor.

⁷ Todos os rabaños de Quedar xuntaranse en ti, os castróns de Nebaiot estarán ó teu servizo, subirán ó meu altar por amor, e eu glorificarei o meu prezado templo.

⁸ Quen son estes que voan como unha nube, si, coma pombas cara ós seus pombais?

⁹ Certamente, xuntaranse onda min as nacións costeiras e os barcos de Tárxix estarán á cabeza, para traeren de lonxe os teus fillos, (e) a súa prata e o seu ouro con eles, para o Nome do Señor, o teu Deus, e para o Santo de Israel, que en verdade te enche de gloria.

¹⁰ Os fillos do estranxeiro reconstruirán as túas murallas, e os seus reis estarán ó teu servizo, pois pola miña ira castigueite, pero polo meu amor tiven compaixón de ti.

¹¹ As túas portas estarán sempre abertas, non se pecharán nin de día nin de noite, para que che traian as riquezas dos pobos, traídas polos seus reis.

¹² Porque o pobo e o reino que non te sirvan a ti perecerán, e os pobos serán totalmente arrasados.

¹³ A riqueza do Líbano virá a ti, o ciprés, o amieiro e o buxo xuntos, para adornar o lugar do meu santuario, o lugar onde eu piso cos meus pés.

¹⁴ Virán prostarse ante ti os fillos dos que te oprimiron, e prostaranse ante a planta dos teus pés todos os que te desprezaron, e chamaranche "Cidade do Señor", "Sión do Santo de Israel".

¹⁵ En vez de estares abandonado, aborrecido, e sen xente que por ti pase, convertereite en esplendor eterno, en causa de gozo por xeracións e xeracións.

¹⁶ Mamarar o leite dos pobos e do peito dos reis mamarás, entón recoñecerás que eu son o Señor, o teu Salvador, si, o teu Redentor, o Forte de Xacob.

¹⁷ En vez de bronce traereiche ouro; e en vez de ferro traereiche prata; en vez de madeira, bronce; e en vez de pedras, ferro. Converterei a Paz no teu inspector e a Xustiza no teu rexedor.

¹⁸ Non se volverá a oír falar de violencia no teu país, nin de saqueo e de arraso dentro dos teus confíns. "Salvación" será o nome dos teus muros e o das túas portas "Loanza".

¹⁹ Non che volverá a servir o sol de luz durante o día, nin te alumará o resplandor da lúa, senón que o Señor será a túa luz eterna e o teu Deus será a túa luminosa gloria.

²⁰ Non se volverá a pór o teu Sol e a túa Lúa non desaparecerá. Si, o Señor será a túa luz eterna e acabaranse os días do teu loito.

²¹ Todos os do teu pobo serán xustos e posuirán a terra eternamente, (serás) xermolo dos seus plantíos, obra das súas mans para que se mostre a súa gloria.

²² O máis pequeno volverase un millar, e o máis miúdo, un pobo poderoso. Eu, Iavé, dareime présa para realizalo ó seu tempo.