Isaías 56 - Biblia SEPT

TRITOISAÍAS (III Is) A fidelidade ó sábado e á Alianza acercan a salvación

¹ Así fala o Señor: cumpride o dereito e practicade a xustiza, que a miña salvación está próxima a chegar e a miña xustiza (está próxima) a mostrarse.

² Benaventurado o home que cumpra isto e o fillo de Adam que se manteña nisto firme, gardando o sábado sen profanalo e gardando a súa man de facer calquera maldade.

³ Que o fillo de estranxeiro que se apega ó Señor non fale nestes termos: "O Señor apártame totalmente do seu pobo". Que o eunuco tampouco diga: "Son a penas unha árbore seca".

⁴ Porque así fala o Señor: Os eunucos que gardan os meus sábados, e elixen o que a min me gusta e que se manteñen firmes na miña Alianza,

⁵ dareilles no meu templo e dentro dos meus muros ración de comida e renome, mellor do que fillos e fillas. Dareilles un nome eterno que non desaparecerá.

⁶ E ós fillos de estranxeiro que se apegan ó Señor, servindo e amando o Nome do Señor, sendo os seus servos, a todo o que garde o sábado sen profanalo e ós que se manteñan firmes na miña Alianza,

⁷ traereinos ó meu monte santo e alegrareinos na miña casa de oración. Os seus holocaustos e os seus sacrificios servirán de ofrenda de amor sobre o meu altar. Pois o meu templo chamarase casa de oración para todos os pobos.

A crise da volta do desterro

⁸ Así fala o Señor, Iavé, quen reúne ós dispersados de Israel: "Volverei congregar arredor de Israel ós que se lle xunten".

⁹ Todas as súas feras do campo, vinde comer, todas as súas feras do bosque.

¹⁰ Os seus vixías están todos eles cegos, non coñecen, todos eles son cans mudos, non son capaces de ladrar, dormen, déitanse, son amigos de sestear.

¹¹ Velaí os cans de poderosa gorxa, que non se saben fartar. Velaí os pastores que non saben distinguir: Todos eles van polo seu vieiro, cada un tras da súa ganancia sen límite.

¹² Vinde, que eu collo o viño, e emborrachémonos de licor, que mañá será coma hoxe, abundancia moito maior.