Isaías 43 - Biblia SEPT

O plan salvífico e de autorrevelación de Deus

¹ Pois agora, así fala o Señor, o teu creador, Xacob, o que te formou, Israel: "Non teñas medo, que eu son o teu redentor; impóñoche o meu nome: ti es meu.

² Cando pases a través das augas, eu estarei contigo; cando pases a través dos ríos, non te engulirán. Cando pases a través do lume, non te queimarás; cando pases por entre as chamas, non prenderán en ti.

³ Porque eu son o Señor, o teu Deus, o santo de Israel, o teu salvador. Porei a Exipto de expiación túa; a Cux e a Sebá poreinos no teu lugar.

⁴ Porque ti fuches ben querido ós meus ollos; fuches glorificado, o meu predilecto; e por isto, farei que a humanidade expíe no teu lugar; e que os pobos paguen pola túa vida.

⁵ Non teñas medo, que eu estou contigo: traerei desde o nacente a túa descendencia, e desde occidente xuntareite,

⁶ direille ó Norte: Dámos, e ó Sur: Non os reteñas: tráeme os meus fillos desde lonxe, e as miñas fillas desde o cabo da terra,

⁷ todo o que se chama co meu Nome, e todo o que creei para a miña gloria, pois eu o formei e o fixen".

⁸ Que saia un pobo cego, pero con ollos; xordo, pero con oídos.

⁹ Os pobos todos xúntanse a un tempo, e congréganse as nacións. Quen entre eles dá a coñecer isto e nos fai oír as antigas predicións? Que presenten testemuñas e xustifiquen a súa postura, que se oia e se teña que dicir: "É verdade!"

¹⁰ Vós sodes as miñas testemuñas —é o Señor quen fala—; si, o meu servo que eu escollín, para que me coñezades e creades en min, e para que recoñezades que só eu son. Antes de min non foi formado ningún deus, e despois de min non existe ningún.

¹¹ Eu, eu son o Señor, e fóra de min non hai outro salvador.

¹² Eu anuncieino e púxeno a salvo, fíxeno oír e non fun un estraño entre vós, e vós sodes as miñas testemuñas —é o Señor quen fala—, mentres eu son Deus.

¹³ Si, desde hoxe eu seguireino sendo, e ninguén estará desprotexido da miña man. O que eu realizo, quen o fará cambiar?

¹⁴ Así fala o Señor, o voso Redentor, o santo de Israel: "Por causa vosa envíoo contra Babilonia e farei caer todos os seus ferrollos; en canto ós caldeos, transformarei con lamentacións os seus berros de alegría.

¹⁵ Eu son o Señor, o voso Santo, o Creador de Israel, o voso Rei".

Actualización renovada da liberación do Éxodo

¹⁶ Así fala o Señor, que fixo un camiño polo mar e unha verea polas augas impetuosas,

¹⁷ que fixo saír carros e cabalos, un exército moi poderoso. Eles deitaranse e non se levantarán, apagáronse coma a torcida dun candil, extinguíronse.

¹⁸ Non vos lembrades das cousas pasadas? Non comprendedes as cousas antigas?

¹⁹ Ollade: eu estou facendo algo novo; xa agroma: non vos dades conta? Si, vou abrir un camiño no deserto, ríos na estepa.

²⁰ Os animais do campo honraranme, os chacais e os poliños da avestruz, porque porei augas no deserto, ríos no ermo, para darlle de beber ó meu pobo, ó meu escollido,

²¹ ó pobo que eu criei para min, e que contará a miña loanza.

Careo de Deus co seu pobo, con finalidade purificadora

²² Pero ti, Xacob, non me invocaches, senón que te cansaches de min, Israel.

²³ Non me trouxeches as reses para os teus holocaustos, nin me honraches cos teus sacrificios, aínda que non te obriguei a darme culto coa ofrenda, nin te carguei coa obriga do incenso.

²⁴ Non me compraches perfumes con cartos, nin me fartaches coa graxa dos teus sacrificios; ó contrario, cos teus pecados obrigáchesme a actuar, e cansáchesme coas túas iniquidades.

²⁵ Eu, eu mesmo, pola miña bondade son quen limpa as túas rebeldías, e dos teus pecados non me lembro.

²⁶ Fai acordo, cando botemos as contas: cóntaos ti mesmo para probares a túa xustiza.

²⁷ O teu pai primeiro pecou, e os teus farsantes dirixentes rebeláronse contra min,

²⁸ por isto deshonraba eu os xefes do Santuario, entregaba Xacob á destrución e Israel ás burlas.