Isaías 23 - Biblia SEPT

Lamentación e senso teolóxico da caída de Tiro

¹ Oráculo contra Tiro. Facede lamentación vós, barcos de Tárxix, que o porto de refuxio quedou esnaquizado. De volta do país de Kitim foille revelado isto a Tárxix.

² Chorade, habitantes da costa, traficantes de Sidón. Os teus mensaxeiros cruzan por augas abundantes:

³ A semente de Xihor viña da colleita do Nilo, a súa ganancia era o comercio cos pobos.

⁴ Avergónzate Sidón, que fala o mar, o refuxio de Iam, nestes termos: "Non me retorcín de dor nin te dei eu á luz: nin criei fillos xa mozos, nin saquei adiante fillas mozas".

⁵ Cando pasa a noticia ós exipcios, retórcense de dor, coa noticia de Tiro.

⁶ Cando pasa a Tárxix, os habitantes da costa fan lamentación.

⁷ É isto causa de alegría para a vosa cidade que ten a orixe nos días remotos, e pés que a levarán lonxe a vivir de emigrante?

⁸ Quen planeou isto contra Tiro, que distribuía coroas, cando os seus comerciantes eran príncipes e os seus traficantes honrados no mundo?

⁹ O Señor dos Exércitos foi quen o dispuxo, para humillar o orgullo do seu esplendor, para facer desprezables a todos os nobres do mundo.

¹⁰ Pasa ó teu país, que eu lle puxen emboscada a Tárxix e xa non hai porto de refuxio.

¹¹ A miña man estaba estendida contra Iam, fixo tremer os reinos. O Señor ordenou que a Canaán lle destruísen as prazas fortes,

¹² e dixo: "non volverás a alegrarte, moza maltratada (filla de Sidón; aínda que vaias a Kitim, tampouco alí haberá descanso para ti.

¹³ A mesma cidade dos caldeos non será para ti. Asiria fundouna para os barcos. Ergueron as torres de asalto, arrasaron os seus castelos, volvérona unha ruína.

¹⁴ Facede lamentación, barcos de Tárxix, que o voso porto de refuxio quedou esnaquizado".

A liberación de Tiro

¹⁵ Sucederá no día aquel, que Tiro quedará esquecida durante setenta anos. Pero nos anos doutro rei, ó cabo dos setenta anos, sucederalle a Tiro coma no cantar da prostituta:

¹⁶ "Colle a arpa, dálle a volta á cidade, prostituta esquecida. Toca ben a arpa, alonga o teu cantar para que sexas recordada".

¹⁷ E sucederá ó cabo dos setenta anos que o Señor visitará Tiro, e Tiro volverá a facer asúa ganancia de prostituta. Prostituirase con todos os reinos que hai sobre a superficie da terra.

¹⁸ A súa ganancia no comercio e a súa paga de prostituta consagraralla ó Señor. Non se almacenará nin amoreará, senón que a súa ganancia será para os que habitan ante a presenza do Señor: comerán e fartaranse e vestirán esplendidamente.