Isaías 19 - Biblia SEPT

Oráculo contra Exipto

¹ Oráculo contra Exipto. Velaí o Señor montado nunha nube lixeira; vai a Exipto, tremen os seus deuses por mor da súa presenza, o corazón de Exipto derrétese nos seus adentros.

² Vou encirrar un Exipto contra o outro: faranse a guerra, cada un co seu irmán, cada un co seu veciño, cidade con cidade, reino con reino.

³ Sobresaltarase o espírito de Exipto e destruirei o seu plan, aínda que consulten ós deuses, ós bruxos, ós nigromantes e ós adiviños.

⁴ Entregarei a Exipto no poder de donos severos e reinará nel un rei cruel —é o Señor, Deus dos Exércitos, quen fala—.

⁵ Secarán as augas da corrente, o río secará e estiñará;

⁶ botarán fedor os canais, os brazos do río no Baixo Exipto baixarán e secarán, a canivela e o xunco murcharán.

⁷ As xunqueiras de onda o río e do esteiro, todos os campos da ribeira secarán e desaparecerán: non serán.

⁸ Suspirarán os pescadores, lamentaranse todos os que botaban o anzol no río, esmorecerán os que largaban a rede sobre a superficie da auga.

⁹ Os que traballaban o liño avergonzaranse, as cardadoras e os teceláns quedarán mirrados,

¹⁰ As súas tecelás andarán humilladas, e todos os que traballan por xornal estarán co ánimo abatido.

¹¹ Que loucos están os príncipes de Soán, os sabios que aconsellan ó Faraón consellos estúpidos! Como lle poderán dicir ó Faraón: "Eu son fillo de sabios, fillo de reis orientais"?

¹² Onde están, logo, os teus sabios? Que che mostren e dean a coñecer o que ten planeado o Señor dos Exércitos sobre Exipto.

¹³ Puxéronse loucos os príncipes de Soán, están enganados os príncipes de Nof, os príncipes das súas tribos fan descarreirar a Exipto.

¹⁴ O Señor vértelles no seu interior un espírito de confusión; por isto abanean Exipto con todas as súas obras, o mesmo que cambalea o borracho co seu vómito.

¹⁵ Deste xeito non haberá para Exipto obra que poida facer a cabeza ou o rabo, a palmeira ou o xunco.

Sinais da conversión de Exipto

¹⁶ No día aquel Exipto será coma as mulleres, abaneará e tremerá ante a man do Señor dos Exércitos, que a vai mover contra el.

¹⁷ E a terra de Xudá converterase en causa de vergonza para Exipto, todo aquel que lla lembre a Exipto sentirá temor ó ver o que o Señor dos Exércitos dispuxo contra Exipto.

¹⁸ No día aquel haberá cinco cidades no país de Exipto, que falarán a lingua de Canaán, e que farán os xuramentos polo Señor dos Exércitos: a unha chamaráselle a cidade do Sol.

¹⁹ No día aquel haberá un altar consagrado a Iavé no medio de Exipto, e unha estela dedicada ó Señor ó lado da súa fronteira,

²⁰ serviralle ó Señor dos Exércitos de sinal e testemuño no país de Exipto. Cando eles clamen ó Señor pola presenza dos opresores, o Señor mandaralles un salvador e un xefe para que os libre.

²¹ O Señor daráselle a coñecer a Exipto, e os exipcios recoñecerán o Señor no día aquel: daranlle culto con sacrificios e oblacións, e farán ó Señor votos, que cumprirán.

²² O Señor ferirá a Exipto con ferida curable, pois converteranse ó Señor, que se lles mostrará propicio e os curará.

²³ No día aquel haberá unha calzada desde Exipto a Asiria, Asiria irá a Exipto e Exipto a Asiria, Exipto dará culto xunto con Asiria.

²⁴ No día aquel Israel será igual ca Exipto e Asiria, será causa de bendición no medio da terra,

²⁵ pois o Señor dos Exércitos hao bendicir nestes termos: "Bendito o meu pobo, Exipto, a obra da miña man, Asiria, e a miña herdanza, Israel".