Isaías 13 - Biblia SEPT

ORÁCULOS DE XUÍZO DE CASTIGO CONTRA AS NACIÓNS Contra Babilonia

¹ Oráculo que contra Babilonia recibiu en visión Isaías, fillo de Amós.

² No alto dunha montaña pelada, levantade a bandeira, berrádelles ben alto, movede os brazos para que entren polo portón dos nobres.

³ Mandéillelo eu ós meus consagrados, a berros convoquei ós meus valentes ante min, ós que gozan coa miña grandeza.

⁴ Ruído de axitación nas montañas, coma un exército numeroso. Ruído de tumulto dos reinos, dos pobos reunidos. O Señor dos Exércitos pasa revista ó exército de combate.

⁵ Veñen de terras afastadas, do cabo do ceo, o Señor e os instrumentos da súa ira, veñen para arrasar toda a cidade.

⁶ Gritade triunfantes: "Está preto o día do Señor! Xa chega a devastación do Deus Devastador!".

⁷ Por isto todas as mans se tornarán febles e todo proxecto humano virá abaixo.

⁸ Todos quedarán estarrecidos. Angustias e dores posúenos, como as dores da muller que se retorce no parto! Cada un horrorízase do seu compañeiro: as caras de ambos volveranse coma o lume.

⁹ Velaí chega cruel o día do Señor, velaí o arrebato e o incendio da súa ira,para converter a cidade nunha desolación, e para borrar dela o seu pecado.

¹⁰ As estrelas do ceo e as constelacións non emitirán a súa luz. O sol unha vez que saia escurecerase, e a lúa non brillará coa súa luz.

¹¹ Castigarei o orbe pola súa maldade e os malvados pola súa iniquidade. Derrubarei a soberbia dos insolentes, e humillarei o orgullo dos que provocan medo.

¹² Os homes serán máis escasos có ouro fino, a humanidade máis có ouro de Ofir.

¹³ Por isto o ceo tremerá e a terra moverase do seu sitio, polo arrebato do Señor dos Exércitos, polo incendio da súa ira.

¹⁴ O mesmo que a gacela espantada e o rabaño que non ten quen o xunte, así cada un se encamiñará ó seu pobo, e fuxirá cara ó seu país.

¹⁵ Todo o que encontren será atravesado, todo o que atrapen caerá pola espada;

¹⁶ os seus meniños serán estrelados ante os propios ollos, as súas casas serán saqueadas, e as súas mulleres, violadas.

¹⁷ Velaí: vou excitar contra eles os medos, que nin estiman a prata nin se compracen no ouro.

¹⁸ Os arcos dos mozos serán esnaquizados, pois non terán compaixón do froito do ventre, nin os seus ollos terán piedade dos fillos.

¹⁹ Si, Babilonia, a perla dos reinos, será adorno do orgullo dos caldeos. Si, será coma a destrución total de Sodoma e de Gomorra.

²⁰ Non será habitada con esplendor, nin repoboada por xeracións e xeracións; ningún nómade plantará alí a súa tenda, nin os pastores deixarán descansar os seus rabaños.

²¹ Alí descansarán os gatos monteses e as súas casas encheranse de mouchos; habitarán alí os poliños da avestruz, e darán brincos os sátiros;

²² desde os pazos ouvearán os cans salvaxes, e os chacais desde os pazos de luxo. Si, a súa hora está próxima a chegar, os seus días non se retrasarán.