Hebreos 9 - Biblia SEPT

Falta de eficacia do culto antigo

¹ Pois tamén a primeira alianza tiña as súas normas para o culto e para o seu santuario, que soamente era terrestre.

² De feito, construíuse unha tenda — santuario, a primeira, onde estaban o candelabro, a mesa e mais os pans ofrendados; chámase o Santo.

³ Despois da segunda cortina está a tenda chamada Santísimo,

⁴ co altar de ouro para o incenso e a arca da alianza cuberta de ouro por todos os lados; nela había unha caixa de ouro co maná, a vara reverdecida de Aharón e mais as táboas da alianza.

⁵ Enriba da arca, os querubíns da Gloria, que cubrían coa súa sombra o lugar da expiación. Pero non hai agora por que seguir falando destas cousas con detalle.

⁶ Estando todo isto construído deste xeito, na primeira tenda entran a miúdo os sacerdotes, para celebraren o culto.

⁷ Pero na segunda, soamente o Sumo Sacerdote, unha vez cada ano, el só, levando sangue, para o ofrecer por si mesmo e polos pecados de descoido do pobo.

⁸ Con iso quere mostrar o Espírito Santo que, mentres a primeira tenda estea en pé, aínda non está aberto o camiño para o santuario.

⁹ Todo isto é un símbolo que se ten que aplicar ó momento actual, pois ofrécense dons e sacrificios, que non son capaces de facer perfecto na súa conciencia a quen practica este culto;

¹⁰ soamente teñen poder de purificar en relación con certas comidas, bebidas e diferentes lavatorios: todas elas normas exteriores impostas ata o momento da reforma.

O sacrificio de Cristo, eficaz e definitivo

¹¹ Pero ó presentarse Cristo coma Sumo Sacerdote dos auténticos bens, entrando a través dunha tenda — santuario maior e máis perfecta, non de feitío humano, isto é, non deste mundo,

¹² e ofrendando o seu propio sangue, non o sangue de carneiros ou de becerros, entrou dunha vez para sempre no santuario e, deste xeito, conseguiu unha redención definitiva.

¹³ Se o sangue de carneiros e de touros e a cinsa dunha xovenca asperxida polos impuros consagra estes, dándolles unha pureza corporal,

¹⁴ moito máis o sangue de Cristo (que movido polo Espírito que animou toda a súa vida, se ofreceu a si mesmo a Deus, coma vítima sen mancha) limpará a nosa conciencia das obras de morte, para así servirmos o Deus vivo.

A Nova Alianza

¹⁵ Por iso é mediador dunha nova alianza, xa que morreu para redimir dos pecados cometidos baixo a primeira alianza, a fin de que os que están chamados á herdanza eterna, poidan recibir o cumprimento desta promesa.

¹⁶ Porque onde hai un testamento é preciso presentar probas da morte do testador;

¹⁷ xa que o testamento é firme soamente en caso de morte, porque mentres viva o testador o testamento non é firme.

¹⁸ Por iso nin sequera a primeira alianza se ten renovado sen sangue,

¹⁹ pois Moisés, logo que lle leu a todo o pobo os preceptos que se conteñen na Lei, colleu o sangue dos becerros xunto con auga, con lá rubia e mais con hisopo e asperxeu no libro e na xente toda,

²⁰ dicindo: "Este é o sangue da alianza que Deus pactou convosco".

²¹ Tamén asperxeu con sangue, de forma semellante, na tenda — santuario e mais en todos os utensilios do culto.

²² Conforme á Lei case todo se purifica con sangue e sen verter sangue non hai perdón.

²³ Porque se foi preciso que os anticipos das realidades celestiais se purificasen con estes ritos, as realidades celestiais mesmas hanse de purificar con sacrificios ben máis poderosos ca estes.

A entrada no ceo

²⁴ Pois o Mesías non entrou nun santuario de feitío humano, copia do verdadeiro, senón que entrou no ceo, para poder presentarse agora diante do mesmo Deus a favor noso;

²⁵ e non para repetir moitas veces o seu propio sacrificio, como fai o Sumo Sacerdote, que entra cada ano no santuario levando sangue alleo,

²⁶ porque, se así for, debería ter sufrido moitas veces desde a creación do mundo; pero a verdade é que agora dunha vez para sempre, no derradeiro dos períodos da historia, co sacrificio de si mesmo, quedou a disposición de todos para acabar co pecado.

²⁷ O mesmo que o destino de todo home é morrer unha vez só e, despois xa da morte, vén o xuízo,

²⁸ Así tamén Cristo, unha vez que se ofrendou para quitar os pecados, volverá a aparecerlles por segunda vez, xa sen ter que ver co pecado, para salvar os que o están agardando con ansia.