Hebreos 3 - Biblia SEPT

SUMO SACERDOTE QUE SE DOÍA DUN E DE QUEN UN SE PODÍA FIAR Fiarse de Moisés e fiarse de Xesús

¹ Por iso, meus sagrados irmáns, que tedes parte na mesma chamada celeste, atendede ó pregoeiro e Sumo Sacerdote da fe e da esperanza que profesamos, Xesús.

² El merécelle fe ó que o puxo, coma a Moisés, á fronte de toda a súa familia.

³ Porque Xesús ten ben merecida unha gloria tanto máis grande cá de Moisés, canto ten máis honor o que constrúe unha casa do que a casa mesma:

⁴ porque toda casa ten un construtor, pero o que constrúe todo é Deus.

⁵ Ora, Moisés mereceu confianza coma criado, para poder testemuñar a toda a casa o que lle foran dicindo;

⁶ pero Cristo mereceu a confianza coma Fillo e sobre a súa propia casa: casa del somos nós, se nos mantemos achegados a Deus na liberdade e se nos prezamos do que esperamos.

Chamada á fidelidade para entrar no acougo de Deus

⁷ Por isto, fala o Espírito Santo: "Se hoxe oídes a súa voz,

⁸ non endurezades o voso corazón, coma cando vos rebelastes, coma o día da proba no deserto,

⁹ cando vosos pais me tentaron, para veren onde chegaba, aínda que xa viran os meus feitos

¹⁰ durante corenta anos: por isto me deu noxo aquela xente, e dixen: o corazón ándalles sempre descarreirado, non se deron conta do meu comportamento;

¹¹ por iso xurei cheo de carraxe: endexamais non entrarán no meu acougo!"

¹² Ollade, irmáns, non sexa que algún de vós teña un ruín e incrédulo corazón, que o aparte do Deus vivo;

¹³ vós, en troques, alentádevos uns ós outros día tras día, mentres se pregoa este hoxe, de xeito que ningún de vós se deixe endurecer, engaiolado polo pecado.

¹⁴ Porque seguimos sendo compañeiros de Cristo, sempre que manteñamos firme ata a fin a confianza absoluta de cando comezamos.

¹⁵ Xa que se nos di: "Se hoxe oídes a súa voz, non endurezades o voso corazón, coma cando vos rebelastes".

¹⁶ Pero quen foron os que se rebelaron, cando oíron? Acaso non foron todos os que, grazas a Moisés, saíron de Exipto?

¹⁷ Quen foron os que lle deron noxo a Deus durante corenta anos? Acaso non foron os que por pecar caeron mortos no deserto?

¹⁸ E a quen lles xurou que non entrarían no seu acougo, senón ós que se rebelaran?

¹⁹ E vemos que non puideron entrar por falta de fe.