Feitos 6 - Biblia SEPT

Institución dos sete diáconos

¹ Por aqueles días, como ía medrando o número dos discípulos, orixinouse un descontento dos helenistas contra os hebreos, porque se desatendía ás viúvas de fala grega no servizo diario.

² Entón os Doce reuniron a asemblea dos discípulos e dixeron: Non está ben que deixemos a palabra de Deus para nos dedicarmos ó servizo das mesas.

³ Polo tanto, irmáns, escollede de entre vós sete homes de bo creto, cheos de Espírito e sabedoría, e poñerémolos para este oficio.

⁴ Nosoutros continuaremos dedicados a oración e ó servizo da palabra.

⁵ A proposta gustou á asemblea, e elixiron a Estevo, home cheo de fe e do Espírito Santo, a Filipe e Prócoro, Nicanor, Timón, Pármenas e Nicolás, prosélito de Antioquía;

⁶ presentáronllelos ós apóstolos, e, despois de orar, impuxéronlles as mans.

⁷ A palabra de Deus crecía, e medraba moito o número dos discípulos en Xerusalén e unha gran cantidade de sacerdotes aceptaban a fe.

Arresto e xuízo de Estevo

⁸ Estevo, cheo de graza e poder, realizaba grandes prodixios e sinais entre o pobo.

⁹ Apareceron algúns da sinagoga chamada dos libertos, dos de Cirene, dos de Alexandría e dos de Cilicia e Asia, para discutiren con Estevo.

¹⁰ Pero non lle daban replicado á ciencia e ó Espírito con que falaba.

¹¹ Entón subornaron uns homes, para que dixesen: "Sentímoslle blasfemar contra Moisés e contra Deus".

¹² Así encirraron ó pobo, ós anciáns e ós mestres da Lei; e, arremetendo contra el, levárono ó consello.

¹³ Presentaron falsas testemuñas, que dicían: "este home non para de blasfemar contra este lugar santo e contra a Lei;

¹⁴ sentímoslle dicir que ese Xesús de Nazaret destruirá este sitio e cambiará os costumes que nos transmitiu Moisés".

¹⁵ Entón todos os que estaban sentados no consello, fixaron a vista nel e o seu rostro pareceulles mesmamente o dun anxo.