Ezequiel 23 - Biblia SEPT

Castigo de Samaría e Xerusalén pola súa infidelidade

¹ Entón veume a palabra do Señor nestes termos:

² —Fillo de Adam, había dúas mulleres, fillas da mesma nai;

³ déronse á prostitución en Exipto; sendo mociñas xa se deron á prostitución. Alí apalpáronlles os seos, Aperetáronlles os seus peitos de virxes.

⁴ Velaí os seus nomes: Oholah, a máis grande; e Oholibah, súa irmá. Despois foron miñas e déronme a luz fillos e mais fillas. Velaí os seus nomes: Oholah chámase Samaría e Oholibah, Xerusalén.

⁵ Oholah, en lugar de ser miña, deuse á prostitución e namorouse dos seus amantes, dos asirios:

⁶ guerreiros vestidos de púrpura, gobernadores e oficiais; todos eles novos, bos mozos, xinetes montados en cabalos.

⁷ Os encantos da súa prostitución entregóullelos a eles, a toda a flor dos asirios, e lixouse con todos os que eran a súa paixón e con todos os seus ídolos volveuse impura.

⁸ Non retirou de Exipto as súas fornicacións, xa que se viñan deitando con ela desde a mocidade, e eles foron quen lle apalparon os seus peitos de virxe e quen puxeron nela os arelos de fornicación.

⁹ Por isto entregueina ó poder dos seus amantes, ó poder dos asirios de quen ela estaba namorada.

¹⁰ Eles destapáronlle as súas vergonzas, colléronlle os fillos e as fillas, e a ela matárona coa espada. Ela converteuse nun nome simbólico para as nacións, pois os asirios executaron a súa sentencia condenatoria.

¹¹ Viu isto a súa irmá Oholibah, e degradou o seu namoro máis ca ela, e degradou a súa fornicación máis cá fornicación da irmá.

¹² Namorouse dos asirios: gobernadores e oficiais, guerreiros vestidos de luxo, xinetes montados en cabalos, todos eles novos, bos mozos.

¹³ Eu vin como se volvía impura: as dúas colleran o mesmo camiño.

¹⁴ Aumentou as súas fornicacións vendo as esculturas de homes sobre as paredes e as figuras dos caldeos pintadas en vermello,

¹⁵ cun cinto polo van e con turbantes que lles agrandaban a cabeza, parecían todos eles xenerais, tiñan o aspecto de babilonios de Caldea, a terra da súa orixe.

¹⁶ Coa soa visión dos seus ollos namorouse deles e mandoulles mensaxeiros a Caldea.

¹⁷ Os babilonios viñeron onda ela, ó leito dos amoríos, volvérona impura coas súas fornicacións, e ela sentiuse impura con eles, e a súa gorxa sentiu noxo deles.

¹⁸ Descubriu os seus xeitos de prostituta e descubriu as súas vergonzas, e entón a miña gorxa sentiu noxo dela, o mesmo que sentira noxo da súa irmá.

¹⁹ Pero ela aumentou as súas prostitucións lembrándose dos días da súa mocidade, cando se prostituíra no país de Exipto.

²⁰ Ela seguiu namorada daqueles mancebos, a carne deles era de burros, a súa semente era semente de cabalos.

²¹ Por isto eu castiguei a lascivia da túa mocidade, de cando os teus peitos eran apalpados por Exipto por causa dos teus seos de moza.

²² Por isto, Oholibah, así fala o meu Señor: —Velaí, estou incitando contra ti os teus amantes, eses dos que a túa gorxa sente noxo, e fareinos vir contra ti de todo o arredor.

²³ Os babilonios e todos os caldeos, anoxados dela, visitan en demanda de axuda a todos os asirios, a eles, novos, bos mozos, gobernadores e oficiais todos eles, ós xenerais e oficiais, montados en cabalos todos eles.

²⁴ Virá contra ti un exército de xinetes e carros, con multitude de tropas; e porán diante de ti todo ó arredor as forcadas, os escudos e mais os helmos; eu expoñerei diante deles a causa e eles xulgarante segundo a súa xustiza.

²⁵ Verterei contra ti os meus celos e tratarante con rabia; arrincaranche o nariz e as orellas e o que che quede caerá a espada; prenderán os teus fillos e as túas fillas e o que che quede será consumido polo lume.

²⁶ Quitaranche os teus vestidos e arrebataranche as túas xoias.

²⁷ Farei desaparecer de ti a túa lascivia e da terra de Exipto a túa fornicación de prostituta; non volverás levantar os teus ollos cara a eles nin te volverás lembrar máis de Exipto.

²⁸ Pois así fala o meu Señor, Iavé: —Velaí, entrégote ó poder dos que ti odias, ó poder daqueles dos que a túa gorxa sente noxo.

²⁹ Tratarante con odio e apoderaranse de todas as túas riquezas, deixarante espida e en coiro, e quedarán ó descuberto as túas vergonzas de prostituta.

³⁰ A túa lascivia e as túas prostitucións trouxéronche isto, por te prostituíres indo tralas nacións, e por te volveres impura cos seus ídolos.

³¹ Colliches o camiño da túa irmá, e por isto eu porei na túa man a súa mesma cunca.

³² Así fala o meu Señor, Iavé: —Beberás a cunca da túa irmá, ben fonda e ben ancha. Servirá para rir e para burlarse pola súa grande cabida.

³³ Ti encheraste de borracheira e de pesares, cunca de horrores e de desolación é a cunca da túa irmá Samaría!

³⁴ Beberala e deixarala baldeira, rillarás o seu barro, e logo racharás os teus peitos, pois son eu quen falei, —é o meu Señor, Iavé, quen fala—.

³⁵ Por isto así fala o meu Señor, Iavé: —Por te esqueceres de min e por me dares as costas, por isto, ti soporta o castigo da túa lascivia e da túa prostitución.

³⁶ O Señor díxome: —Fillo de Adam, xulga a Oholah e a Oholibah, bótalles na cara as súas abominacións.

³⁷ Si que cometeron adulterios! Teñen sangue nas súas mans e cometeron adulterios cos seus ídolos; e ademais os seus propios fillos, que para min deran a luz, servíronllelos en comida ós ídolos.

³⁸ E aínda me fixeron isto: contaminaron o meu santuario o día aquel e profanaron os meus sábados.

³⁹ O ofreceren os seus fillos ós ídolos en sacrificio, o día aquel entraron no meu santuario, profanándoo. Velaí o que fixeron dentro da miña Casa.

⁴⁰ Aínda máis, fanlles regalos a homes que veñen de lonxe, ós que mandaron mensaxeiros; e velaí que viñeron con sorte: ti bañácheste, pintaches os ollos e engalanácheste con xoias.

⁴¹ Logo deitácheste en diván pomposo, cunha mesa preparada diante do diván, e puxeches fronte ó diván o meu incenso e os meus perfumes aceitosos.

⁴² No diván oíase o balbordo dunha multitude leda, e un exército de homes, que foron invitados a vir do deserto, —unha abundancia de homes— enchíanse de beber. Entón eles puxeron brazaletes nos brazos delas e unha diadema espléndida nas cabezas.

⁴³ Eu dixen: Certo, agora adulterios! Ai, prostituta, lasciva tamén ela!

⁴⁴ Veñen onda ela, como se vai xunto dunha prostituta! Así viñeron onda Oholah e Oholibah, esas mulleres impúdicas.

⁴⁵ Velaí os homes xustos que as han xulgar coa sentencia das adúlteras e coa sentencia das asasinas, pois elas son adúlteras e teñen sangue nas súas mans.

⁴⁶ Pois así fala o meu Señor, Iavé: —Fai subir contra elas unha multitude e entrégaas á aldraxe e ó saqueo.

⁴⁷ Que a xente lance pedras contra elas e que as esnaquicen coas súas espadas, que maten ós seus fillos e ás súas fillas, e que queimen co lume as súas casas.

⁴⁸ Farei desaparecer a lascivia do país, e escarmentarán todas as mulleres, que non volverán imitar a vosa infamia.

⁴⁹ Farase caer sobre vós a vosa lascivia e soportaredes os vosos pecados de idolatría. Entón recoñeceredes que eu son o Señor, Deus.