Ezequiel 18 - Biblia SEPT

O Deus xusto e a retribución individual

¹ Veume a palabra do Señor nestes termos:

² Que vos pasa a vós, que andades repetindo este dito na terra de Israel: "Os pais comeron as uvas verdes e os fillos sofren a denteira"?

³ Pola miña vida —é o meu Señor, Iavé quen fala— xuro que vós non volveredes repetir este dito en Israel.

⁴ Pois, de certo, todas as vidas son miñas; o mesmo cá vida do pai, tamén a vida do fillo é miña; a persoa que peque, esa é a que morrerá.

⁵ Se un home é xusto, e practica o dereito e mais a xustiza:

⁶ non come banquetes sacros nas montañas nin levanta os seus ollos cara ós ídolos da casa de Israel; non profana a muller do seu próximo, nin se achega á muller na menstruación;

⁷ se o tal non explota a ninguén, devolve a fianza da súa débeda, non comete roubo, dálle o seu pan ó famento e cobre ó espido con vestidos;

⁸ se non presta con usura nin cobra os intereses; se aparta a súa man da iniquidade, e xulga conforme o dereito e a verdade entre home e home;

⁹ se camiña conforme os meus preceptos e garda os meus mandamentos, practicando a verdade e a xustiza: este certamente vivirá. —é o meu Señor, Iavé, quen fala—.

¹⁰ Pero se un xera un fillo asasino, ou se o familiar comete algunha destas cousas

¹¹ Aínda que el non faga ningunha: tal coma comer banquetes sacros nas montañas e profanar a muller do seu próximo;

¹² explotar o desgraciado e o pobre, roubar e non volver o peñor da fianza, erguer os seus ollos cara ós ídolos e cometer abominacións;

¹³ prestar con usura, cobrar intereses, acaso vivirá? —Non vivirá: cometeu todas estas abominacións e morrerá sen remedio; o sangue dos seus crimes volverase contra el.

¹⁴ Pero, velaí, un ten un fillo que ve os pecados que fai seu pai, veos pero non se comporta conforme a eles;

¹⁵ non come banquetes sagrados nas montañas, non ergue os seus ollos cara ós ídolos da casa de Israel; non profana a muller do seu próximo;

¹⁶ non explota, nin retén o peñor da fianza; non rouba, dálle o seu pan ó famento e veste ó espido;

¹⁷ Aparta a súa man de provocar aflicións, non cobra intereses nin usura; cumpre os meus mandamentos e camiña polos meus preceptos: este non morrerá polos pecados de seu pai, ben certo que vivirá.

¹⁸ O seu pai, xa que oprimiu e roubou ó irmán e xa que non fixo no medio do seu pobo o que está ben, morrerá de certo pola súa iniquidade.

¹⁹ Pero vós dicides: "por que non carga o fillo coa iniquidade do pai?" —Porque se o fillo observou o dereito e a xustiza, e se gardou todos os meus preceptos e se os puxo en práctica, vivirá certamente.

²⁰ O que peque será quen morrerá; o fillo non cargará coa iniquidade do pai, o pai non cargará coa iniquidade do fillo; sobre o xusto reverterá a súa xustiza, sobre o malvado reverterá a súa ruindade.

²¹ Se o malvado se converte de todos os pecados que cometeu, e garda todos os meus preceptos e practica o dereito e a xustiza, vivirá de certo, non morrerá;

²² Todas as maldades que cometeu non se lle terán en conta: por mor da xustiza que practicou, vivirá.

²³ É acaso verdade que sinto eu pracer coa morte do malvado, —é o meu Señor, Iavé, quen fala— e non en que se converta do seu camiño e que viva?

²⁴ Cando o xusto se aparta da xustiza e comete a maldade, e se comporta e vive segundo todas as abominacións que comete o malvado, todas as obras boas que fixo non se terán en conta: polas infidelidades que cometeu e polos pecados que fixo, por eles morrerá.

²⁵ E vós respondedes: "Non é xusto o proceder do Señor". Escoitade, Casa de Israel: —Non é xusto o meu xeito de comportarme? Non é máis ben o xeito de vos comportardes vosoutros o que é inxusto?

²⁶ Cando o xusto se aparta das súas obras de xustiza e comete iniquidades e morre debido a elas, morre debido ás iniquidades que el cometeu.

²⁷ Cando o malvado se aparta da maldade que cometeu e practica o dereito e a xustiza, entón el consegue a vida.

²⁸ Se cae na conta e se aparta da maldade que cometeu, vivirá de certo, non morrerá.

²⁹ E responde a Casa de Israel: "Non é xusto o xeito de se comportar o Señor". —Non é xusto o meu comportamento, Casa de Israel? Non é mais ben o voso comportamento o que é inxusto?

³⁰ Por isto, xulgareivos a cada un de vós conforme o propio comportamento, Casa de Israel, —é o meu Señor, Iavé, quen fala—. Convertédevos e apartádevos das vosas ruindades, e non teredes o tropezo para caer na iniquidade.

³¹ Quitade de diante de vós as vosas maldades coas que pecastes, e facédevos un corazón novo e un espírito novo. Por que queredes morrer, Casa de Israel?

³² Non sinto eu pracer pola morte do que morre —é o meu Señor, Iavé quen fala— Convertédevos e viviredes!