Éxodo 6 - Biblia SEPT

Iavé, o Deus dos pais

¹ O Señor díxolle a Moisés: —"Agora verás o que vou facer co faraón. Forzado por man rexa, deixaravos saír e mesmo vos botará da súa terra".

² Deus seguiu dicindo: —"Eu son Iavé.

³ Aparecinme a Abraham, a Isaac e a Xacob co nome de Deus todopoderoso; pero non lles dei a coñecer o meu nome Iavé.

⁴ Eu fixen con eles un pacto: darlles o país de Canaán, terra na que viviron coma forasteiros.

⁵ Estou escoitando as queixas dos israelitas que os exipcios asoballan; teño en conta o meu pacto.

⁶ Dilles, pois, ós israelitas: Eu, Iavé, tirareivos de debaixo da carga que vos impoñen os exipcios, sacareivos da súa servidume, librareivos con brazo estendido e con grandes escarmentos.

⁷ Tomareivos coma meu pobo e eu serei o voso Deus. Saberedes que eu son Iavé, o voso Deus, o que vos tirou de debaixo da carga dos exipcios.

⁸ Levareivos á terra que xurei darlles a Abraham, a Isaac e a Xacob, e daréivola a vós en posesión. Eu, Iavé".

⁹ Moisés díxolles ós israelitas todo iso. Pero non lle fixeron caso, polo desfalecemento do espírito baixo a dureza do traballo.

¹⁰ O Señor díxolle a Moisés:

¹¹ —"Vai onda o faraón, rei de Exipto, e dille que deixe saír os israelitas da súa terra".

¹² Moisés respondeulle: —"Se non me fan caso os israelitas, como mo vai facer o faraón, sendo eu tan torpe de palabras?"

¹³ Pero o Señor seguiu falando con Moisés e Aharón e dándolles as súas ordes para os israelitas e para o faraón, rei de Exipto, co fin de sacar de alí ós israelitas.

Xenealoxía de Moisés e Aharón

¹⁴ Estes foron os xefes dalgunhas familias patriarcais. Fillos de Rubén, primoxénito de Israel: Hanoc, Palú, Hesrón e Carmí. Estes son os clans de Rubén.

¹⁵ Fillos de Simeón: Iemuel, Iamín, Ohad, Iaquín, Sohar e Xaúl, o fillo da cananea. Estes son os clans de Simeón.

¹⁶ Estes son os nomes dos fillos de Leví, conforme as súas xeracións: Guerxón, Quehat e Merarí. Leví viviu cento trinta e sete anos.

¹⁷ Fillos de Guerxón: Libní e Ximí, coas súas familias.

¹⁸ Fillos de Quehat: Amram, Ishar, Hebrón e Uziel. Quehat viviu cento trinta e tres anos.

¹⁹ Fillos de Merarí: Mahlí e Muxí. Estes son os clans de Leví, conforme as súas xeracións.

²⁰ Amram tomou por muller á súa parente Ioquébed, que lle deu a Aharón e a Moisés. Amram viviu cento trinta e sete anos.

²¹ Fillos de Ishar: Córah, Néfeg e Zicrí.

²² Fillos de Uziel: Mixael, Elsafán e Sitrí.

²³ Aharón tomou por muller a Elixeba, filla de Aminadab e irmá de Nahxón; ela deulle por fillos a Nadab, Abihú, Elazar e Itamar.

²⁴ Fillos de Córah: Asir, Elcanah e Abiasaf. Estes son os clans de Córah.

²⁵ Elazar tomou por muller unha das fillas de Futiel, que lle deu a Pinhás. Estes son os xefes das familias dos levitas, conforme os seus clans.

²⁶ Foi a Aharón e a Moisés ós que lles dixo o Señor: —"Sacade as multitudes dos israelitas de Exipto";

²⁷ os que falaron ó faraón, rei de Exipto, de deixalos saír de alí. Eses foron Moisés e Aharón.

²⁸ Cando o Señor falou con Moisés en Exipto,

²⁹ díxolle: —"Eu son Iavé. Repítelle ó faraón, rei de Exipto, todo o que eu che digo".

³⁰ Respondeulle Moisés: —"Como me fará caso o faraón, sendo eu tan torpe de palabra?"