Éxodo 39 - Biblia SEPT

As vestiduras dos sacerdotes

¹ Con púrpura violácea, escarlata e carmesí, e con liño fino fixeron as vestiduras sagradas para o servizo do santuario, e os ornamentos sacros de Aharón, como ordenara o Señor a Moisés.

O efod

² O efod fixérono de ouro, de púrpura violácea, escarlata e carmesí, e de liño fino torcido.

³ Puxeron o ouro en láminas, delas tiraron fíos e con estes bordaron a púrpura violácea, escarlata e carmesí, e o liño fino torcido.

⁴ Fixéronlle dúas ombreiras, unidas polos cabos.

⁵ O cíngulo saía do efod, e era da feitura deste: de ouro, de púrpura violácea, escarlata e carmesí, e de liño fino torcido, como mandara o Señor a Moisés.

⁶ Prepararon pedras de ónix, engastadas en ouro, e gravaron nelas, o mesmo ca nun selo, os nomes das tribos de Israel.

⁷ Colocáronas nas ombreiras do efod, pois eran as pedras da lembranza das tribos de Israel, como lle mandara o Señor a Moisés.

O peitoral

⁸ Fixeron o peitoral, traballado con arte, da mesma feitura do efod, de ouro, púrpura violácea, escarlata e carmesí, e de liño fino torcido.

⁹ Era cadrado, dobre, un palmo de longo e un de ancho.

¹⁰ Engastaron nel catro ringleiras de pedras. Na primeira unha sardónica, un topacio e unha esmeralda;

¹¹ na segunda un rubí, un zafiro e un xaspe;

¹² na terceira un ópalo, unha ágata e unha ametista;

¹³ e na cuarta un crisólito, un ónix e un berilo. As pedras estaban todas engastadas en ouro.

¹⁴ Correspondíanse cos nomes das tribos de Israel, doce pedras para doce nomes. Cada pedra levaba gravado coma un selo o nome dunha das doce tribos.

¹⁵ Para o peitoral fixeron cadeíñas de ouro puro, trenzadas coma un cordón.

¹⁶ Por parte prepararon dous engastes de ouro e dous aneis tamén de ouro. Os aneis fixáronos nos dous cabos do peitoral.

¹⁷ Pasaron logo por eles as dúas cadeíñas de ouro

¹⁸ e as dúas puntas das cadeíñas fixáronas nos engastes que ían collidos na dianteira das ombreiras do efod.

¹⁹ Outros dous aneis que fixeron puxéronos nos cabos da parte baixa do peitoral, polo lado de dentro, de cara para o efod.

²⁰ E outros dous aneis máis fixáronos nas dúas ombreiras do efod, na parte inferior dianteira, onda a xuntura e por enriba do cíngulo do efod.

²¹ Cun cordón de púrpura violácea suxeitaron os aneis do peitoral cos do efod, de xeito que o peitoral quedase por enriba do cíngulo do efod e non se soltase del, como mandara o Señor a Moisés.

O manto

²² Teceron despois o manto do efod, todo de púrpura violácea.

²³ No medio, por enriba, levaba unha abertura, cunha orla arredor, coma unha cota, para que non se esgazase.

²⁴ No borde baixo, ó redor, puxéronlle granadas de púrpura violácea, escarlata e carmesí, e de liño fino torcido.

²⁵ Fixeron logo campaíñas de ouro puro e puxéronllas por entre as granadas, ó redor,

²⁶ Alternándose unhas coas outras. O manto era para oficiar, como ordenara o Señor a Moisés.

Outras vestiduras

²⁷ Para Aharón e para os seus fillos fixeron túnicas,

²⁸ tiaras e mitras de liño fino con enfeites, e calzóns de liño fino torcido;

²⁹ e, por parte, cíngulos de liño fino torcido, bordados, de púrpura violácea, escarlata e carmesí, como o Señor lle ordenara a Moisés.

A diadema

³⁰ Fixeron tamén de ouro puro a flor da sagrada diadema e gravaron nela, como se fai nun selo: Consagrado ó Señor.

³¹ Cun cordón de púrpura violácea suxeitárona na dianteira da tiara, como o Señor mandara a Moisés.

Moisés aproba as obras

³² Quedaron así acabados os traballos do tabernáculo e da Tenda do Encontro. Os israelitas fixeron todo como lles mandara Moisés.

³³ Entón presentáronlle a Moisés o tabernáculo e a Tenda, con todos os seus utensilios, os broches, as táboas, os varais, as columnas e os baseamentos;

³⁴ A cuberta de pel curtida de carneiro, a cuberta de pel de teixugo, o veo de tapar a arca;

³⁵ A arca da alianza, os seus traveseiros e mais o propiciatorio;

³⁶ A mesa cos seus accesorios e mais os pans presentados;

³⁷ o candelabro de ouro puro coas súas lámpadas, cos seus trebellos e co aceite do alumado;

³⁸ o altar de ouro, o óleo da unción, o incenso cos aromas, a cortina da entrada da Tenda;

³⁹ o altar de bronce coa súa reixa de bronce, cos seus varais e outros trebellos, a pía co seu fuste;

⁴⁰ A cortina do adro coas súas columnas e os seus baseamentos, a cortina da entrada do adro coas súas cordas e as súas estacas, e todas as demais cousas para o servizo do tabernáculo e da Tenda do Encontro;

⁴¹ As vestiduras para o servizo do santuario e os sagrados ornamentos para oficiar o sacerdote Aharón e seus fillos.

⁴² Os israelitas fixeron o traballo como o Señor lle ordenara a Moisés.

⁴³ Moisés examinou todas as obras, e viu que estaban feitas conforme lle mandara o Señor. E deulles a súa bendición.