Éxodo 38 - Biblia SEPT

O altar dos holocaustos

¹ Fixo tamén o altar dos holocaustos de madeira de acacia, cadrado, de cinco cóbados de longo, cinco de ancho e tres de alto.

² Nos catro ángulos fíxolle saíntes coma cornos e revestiunos de bronce.

³ Fixo logo os trebellos do altar, todos de bronce: caldeiros, paletas, aspersorios, tenaces e braseiros.

⁴ O altar fíxolle, de bronce, un enreixado da forma dunha rede, e púxollo por debaixo do reborde, desde a media altura ata o chan.

⁵ Para os catro ángulos do enreixado de bronce fundiu catro argolas, para meter por elas os varais.

⁶ Logo fixo os varais de madeira de acacia e recubriunos de bronce.

⁷ Meteunos polas argolas dos dous lados do altar, para transportalo con elas. O altar fíxoo oco e de táboas.

A pía de bronce

⁸ Fixo a pía de bronce, coa base tamén de bronce, cos espellos das mulleres que servían á entrada da Tenda do Encontro.

O adro

⁹ Despois fixo o adro. Púxolle polo lado sur cortinas de liño fino torcido, dun longo de cen cóbados.

¹⁰ As súas vinte columnas cos seus vinte baseamentos eran de bronce; os ganchos das columnas e as argolas eran de prata.

¹¹ Polo lado norte púxolle cen cóbados de cortinas; as súas vinte columnas cos seus vinte baseamentos eran de bronce; os ganchos das columnas e as argolas eran de prata.

¹² Polo lado do ocaso o adro levaba cincuenta cóbados de cortinas, con dez columnas e dez baseamentos e con ganchos e argolas de prata.

¹³ Na parte dianteira, de cara ó nacente, levantou cincuenta cóbados de cortina.

¹⁴ Nun lado da porta ían quince cóbados de cortina, con tres columnas e tres baseamentos.

¹⁵ Do lado oposto, a mesma cousa.

¹⁶ As cortinas arredor do adro eran todas de liño fino torcido.

¹⁷ Os baseamentos das columnas eran de bronce, os ganchos e as argolas de prata, e revestidos tamén de prata os capiteis. As columnas do adro levaban todas aneis de prata.

¹⁸ A cortina da entrada do adro era bordada, de púrpura violácea, escarlata e carmesí, e de liño fino torcido; tiña vinte cóbados de longo por cinco de alto, correspondía coa altura das cortinas do adro.

¹⁹ As catro columnas das que colgaba a cortina, coas súas basas, eran de bronce, os ganchos de prata, os capiteis e as molduras recubertas tamén de prata.

²⁰ As estacas arredor do tabernáculo e do adro eran todas de bronce.

Os gastos das obras

²¹ Estas son as contas da construción do tabernáculo da alianza, segundo as fixeron os levitas, por orde de Moisés, baixo a dirección de Itamar, fillo do sacerdote Aharón.

²² Besalel, fillo de Urí, fillo de Hur, da tribo de Xudá, fixo todo o que o Señor lle mandara a Moisés.

²³ Axudoulle Oholiab, fillo de Ahisamac, da tribo de Dan, artesán, escultor e bordador de púrpura violácea, escarlata e carmesí, e de liño fino.

²⁴ A suma do ouro empregado na construción do santuario, todo levado en ofrenda, foi de vinte e nove talentos, con setecentos trinta siclos, segundo o siclo do templo.

²⁵ A prata dos rexistrados no censo da comunidade sumaba cen talentos, con mil setecentos setenta e cinco siclos, segundo o siclo do templo.

²⁶ Correspondía a cada un dos censados, de vinte anos para arriba, a cantidade de medio siclo, segundo o siclo do templo. O total de homes era de seiscentos tres mil cincocentos cincuenta.

²⁷ Os cen talentos de prata empregáronse en fundir os cen baseamentos do santuario e do veo, a talento por baseamento.

²⁸ Cos mil setecentos setenta e cinco siclos fixéronse os ganchos para as columnas, dotáronse as molduras e revestíronse os capiteis.

²⁹ O bronce ofrecido foi de setenta talentos, con dous mil catrocentos siclos.

³⁰ Con el fixéronse os baseamentos da entrada da Tenda do Encontro, o altar de bronce coa súa reixa e os obxectos todos do altar,

³¹ os baseamentos arredor do adro e as da súa porta, e todas as estacas do tabernáculo e do adro.