Éxodo 31 - Biblia SEPT

Os artífices do santuario

¹ O Señor díxolle a Moisés:

² —"Ves que chamei polo seu nome a Besalel, fillo de Urí, fillo de Hur, da tribo de Xudá,

³ e que o enchín do espírito de Deus, de sabedoría, de intelixencia e de habilidade para calquera labor:

⁴ para concibir proxectos, para labrar o ouro, a prata e o bronce,

⁵ para tallar pedras e engastalas, para tallar madeiras e facer calquera obra.

⁶ Ves tamén que lle dei por axudante a Oholiab, fillo de Ahisamac, da tribo de Dan. A todos os homes capaces deilles habilidade, para que poidan facer todo canto che mandei:

⁷ A Tenda do Encontro, a arca da alianza co propiciatorio que está por riba dela, e os utensilios todos da tenda,

⁸ A mesa cos seus accesorios, o candelabro de ouro cos seus trebellos, o altar do incenso,

⁹ o altar dos holocaustos con todos os seus utensilios e a pía coa súa base,

¹⁰ As vestiduras sacras do sacerdote Aharón e de seus fillos, cando serven no santuario,

¹¹ o óleo da unción, o incenso recendente para o santuario. Farán todas esas cousas conforme eu che mandei".

O descanso do sábado

¹² O Señor díxolle a Moisés:

¹³ —"Dilles ós israelitas: Gardaredes o meu sábado, porque o sábado é o sinal entre min e vós, dunhas a outras xeracións, polo que coñeceredes que eu son o Señor que vos consagro.

¹⁴ Gardaredes o sábado, que será día santo para vós. O que o profane será reo de morte; o que traballe nese día será excluído do pobo.

¹⁵ Seis días traballarás, pero o sétimo, sábado, é día de lecer, consagrado ó Señor. O que traballe en día de sábado será reo de morte.

¹⁶ Os israelitas gardarán o día do sábado, celebrarano polas xeracións, cumprindo un pacto perpetuo.

¹⁷ Será sinal duradeiro entre min e os israelitas, pois en seis días fixo o Señor o ceo e a terra, e o sétimo descansou".

¹⁸ Cando o Señor rematou de falar con Moisés no monte Sinaí, entregoulle as dúas táboas da alianza, táboas de pedra escritas polo dedo de Deus.