Éxodo 26 - Biblia SEPT

O tabernáculo

¹ O tabernáculo faralo con dez lenzos de liño fino torcido, de púrpura violácea, escarlata e carmesí, con querubíns bordados.

² Cada lenzo terá vinte e oito cóbados de longo por catro de ancho. O mesmo medirán todos os lenzos.

³ Os lenzos empalmarán uns cos outros, en dúas series de cinco cada unha.

⁴ Farás unhas presillas de púrpura violácea, na beira do lenzo extremo de cada unha das dúas series.

⁵ Cincuenta presillas irán na beira dunha serie e cincuenta na da outra, postas de xeito que caian enfronte unhas das outras.

⁶ Farás tamén cincuenta broches de ouro e axuntarás os lenzos con eles, de xeito que o tabernáculo figure un conxunto.

⁷ Tecerás despois once lenzos de pelo de cabra, para que lle fagan de Tenda ó tabernáculo.

⁸ A lonxitude do lenzo será de trinta cóbados e o ancho de catro. Esta será a medida para todos os lenzos.

⁹ Empalmarás cinco lenzos nunha serie e seis noutra, de xeito que o sexto lenzo caia fronte á porta.

¹⁰ Porás cincuenta presillas nas beiras de cada unha das dúas series de lenzos empalmados.

¹¹ Fundirás cincuenta broches de bronce, meteralos nas presillas, e así quedará composta a Tenda nunha peza.

¹² En canto ó que sobrar dos lenzos da Tenda, a metade dun deles colgará por detrás do tabernáculo,

¹³ e o cóbado sobrante polos lados colgará polos dous lados do tabernáculo e taparao.

¹⁴ Farás aínda para o tabernáculo unha cuberta de peles curtidas de carneiro, e por enriba dela outra cuberta de peles de teixugo.

¹⁵ As táboas do tabernáculo faralas de madeira de acacia.

¹⁶ A longura dunha táboa será de dez cóbados e o ancho de un e medio.

¹⁷ Cada táboa rematará en dous cantís, para ensamblar unhas nas outras. E o mesmo todas as táboas.

¹⁸ Unha vez feitas as táboas para o tabernáculo, porás vinte do lado que mira cara ó sur.

¹⁹ Farás corenta baseamentos de prata e poralas, dúas a dúas, debaixo das vinte táboas, unha por cada cantil.

²⁰ Polo outro lado do tabernáculo, ó norte, porás outras vinte táboas,

²¹ cos correspondentes corenta baseamentos de prata, dúas debaixo de cada táboa.

²² Polo lado posterior do tabernáculo, ó ocaso, colocarás seis táboas,

²³ con dúas máis para os dous cantos.

²⁴ Estas encaixarán de abaixo para arriba; as dúas táboas farán os dous cantos.

²⁵ Serán, pois, oito táboas, con dezaseis baseamentos de prata, dúas por cada táboa.

²⁶ Farás tamén traveseiros de madeira de acacia, cinco para cruzar as táboas dun lado do tabernáculo,

²⁷ cinco para as do outro e cinco para as do ocaso.

²⁸ O traveseiro que pasará polo medio das táboas irá dun cabo ó outro.

²⁹ Recubrirás de ouro as táboas e os traveseiros, e de ouro serán tamén as argolas, polas que pasarán os traveseiros.

³⁰ Construirás o tabernáculo conforme o modelo que eu che mostrei na montaña.

O veo e a cortina

³¹ Farás un veo de púrpura violácea, escarlata e carmesí, de liño fino torcido, con querubíns bordados.

³² Penduraralo de catro columnas de madeira de acacia, recubertas de ouro, con ganchos de ouro e catro baseamentos de prata.

³³ Pendurarás o veo de cravos. Dentro porás a arca da alianza. O veo separará o lugar santo do santísimo.

³⁴ Porás o propiciatorio encima da arca da alianza, no santísimo.

³⁵ Por fóra do veo, do lado norte, colocarás a mesa; e enfronte da mesa, do lado sur do santuario, o candelabro.

³⁶ Para a entrada da tenda farás unha cortina, de púrpura violácea, escarlata e carmesí, de liño fino torcido e bordada.

³⁷ Para a cortina farás cinco columnas de madeira de acacia, recubertas de ouro, con cinco ganchos de ouro; para as columnas fundirás cinco baseamentos de bronce.