Éxodo 25 - Biblia SEPT

Construción do santuario

¹ O Señor faloulle a Moisés:

² —"Di lles ós israelitas que me presenten unha ofrenda. Aceptarédela de todos aqueles que de corazón ma queiran ofrecer.

³ As cousas que podedes aceptar como ofrenda serán: ouro, prata e bronce,

⁴ púrpura violácea, escarlata e carmesí, liño e pelo de cabra,

⁵ peles de carneiro curtidas, peles de teixugo e madeira de acacia,

⁶ Aceite para as lámpadas, aromas para o óleo de unción e para o incenso,

⁷ pedras de ónix e pedras de engaste para o efod e para o peitoral.

⁸ Que me fagan un santuario, onde eu habite no medio deles.

⁹ Faredes o tabernáculo e os utensilios para o culto conforme o modelo que eu che indicarei.

A arca

¹⁰ Construirás unha arca de madeira de acacia de dous cóbados e medio de longa, un e medio de ancha e un e medio de alta.

¹¹ Revestirala de ouro puro por dentro e por fóra; por enriba, ó arredor, poraslle unha cinta tamén de ouro.

¹² De ouro fundido farás catro argolas e porasllas nos catro cantos, dúas para un flanco e dúas para o outro.

¹³ Despois farás varais de madeira de acacia, revestiralos de ouro

¹⁴ e meteralos polas argolas dos dous lados da arca, para podela transportar.

¹⁵ Os varais quedarán metidos nas argolas e non se sacarán delas.

¹⁶ Na arca meterás o testemuño que eu che darei.

¹⁷ Farás o propiciatorio de ouro puro, de dous cóbados e medio de longo e un e medio de ancho.

¹⁸ Despois cicelarás dous querubíns de ouro para os seus dous extremos.

¹⁹ Porás un querubín en cada extremo, formando un corpo co propiciatorio.

²⁰ Os querubíns despregarán as ás cara arriba, cubrindo o propiciatorio; mirarán cara ó centro deste, un enfronte do outro.

²¹ Porás o propiciatorio encima da arca, e nesta depositarás o testemuño que eu che darei.

²² Desde enriba do propiciatorio, entre os dous querubíns que están encima da arca do testemuño, virei ó teu encontro e direiche todo o que teña que mandarche para os israelitas.

A mesa dos pans sagrados

²³ Farás unha mesa de madeira de acacia, de dous cóbados de longa, un de ancha e un e medio de alta.

²⁴ Revestirala de ouro puro e poraslle ó redor unha cinta de ouro.

²⁵ O redor faraslle un reborde dun palmo, no que porás tamén unha cinta de ouro.

²⁶ Farás catro argolas de ouro e poralas nos catro cantos da mesa, unha por cada pé.

²⁷ As argolas estarán agarradas no reborde. Por elas meteranse os varais para transportar a mesa.

²⁸ Os varais faralos de madeira de acacia, revestidos de ouro. Con eles poderase erguer a mesa.

²⁹ Farás tamén pratos, cuncas, xerras e vasos para as libacións, todo de ouro puro.

³⁰ Encima da mesa porás os pans presentados, que estarán sempre diante de min.

O candelabro

³¹ Farás un candelabro de ouro puro, traballado a martelo, coa súa base e co seu fuste. Formarán unha peza con el as súas copas, os seus cálices e as súas corolas.

³² Dos seus lados sairán seis brazos, tres dun lado e tres do outro.

³³ Cada brazo terá tres copas, coma a flor da améndoa, co seu cáliz e a súa corola. Serán o mesmo os seis brazos que sairán do candelabro.

³⁴ O candelabro terá no fuste catro copas, coma as flores da améndoa, cada unha co seu cáliz e coa súa corola.

³⁵ Debaixo de cada parella de brazos que saen do candelabro, levará un cáliz. Así será cos seis brazos.

³⁶ Os cálices e mais os brazos serán dunha mesma peza, cicelados en ouro puro.

³⁷ Despois farás sete lámpadas e poralas no candelabro, para que alumen cara adiante.

³⁸ As pinzas para avivecelas e os seus cinseiros serán de ouro puro.

³⁹ Cun talento de ouro puro farás o candelabro e todos os seus trebellos.

⁴⁰ Coida de facelo todo conforme o modelo que che mostrei na montaña.