Éxodo 23 - Biblia SEPT

Xustiza

¹ Non propagarás rumores mentireiros. Non te xuntarás cun malvado para dar testemuño en favor da inxustiza.

² Non te deixes ir coa maioría para facer o mal, nin te poñas do lado dela nun xuízo, violando o dereito.

³ Non favorecerás ó poderoso na súa causa.

⁴ Se atopas o boi ou o asno que perdeu o teu inimigo, levaralos onda el.

⁵ Se ver o asno do adversario caído baixo a súa carga, non o deixes abandonado; axúdalle a erguelo.

⁶ Non torzas o dereito no xuízo do pobre.

⁷ Fuxe da causa mentireira. Non fagas condenar ós inocentes nin ós xustos, pois eu non declaro inocente ó malvado.

⁸ Non admitas regalos, pois os regalos cegan mesmo ós asisados e torcen o dereito dos xustos.

⁹ Non oprimas o estranxeiro. Vós coñecedes a súa condición, pois fostes estranxeiros en Exipto.

O sábado e as festas

¹⁰ Seis anos sementarás a túa terra e recollerás os seus froitos.

¹¹ Pero o sétimo deixarala en barbeito, para que poidan comer os pobres do teu pobo e pazan do que lles sobre os animais do monte. Farás o mesmo coa túa viña e coas túas oliveiras.

¹² Seis días traballarás, e o sétimo descansarás, para que descanse o teu boi e o teu asno, e para que teñan un respiro o teu servo e o forasteiro.

¹³ Observade todo o que vos digo. Non invoquedes o nome doutros deuses; que nin sequera se sinta nos teus labios.

¹⁴ Celebrarás tres festas no ano.

¹⁵ Garda a festa dos Ácimos. Sete días comerás pan sen levedar, conforme che mandei, no tempo fixado do mes de abib, pois nel saístes de Exipto. E non viredes onda min coas mans baldeiras.

¹⁶ E a festa da Seitura, dos primeiros froitos dos teus traballos, do que sementaches nos teus eidos. E a festa da Colleita, á fin do ano, cando recolles nos teus eidos o froito do teu traballo.

¹⁷ Tres veces no ano comparecerán os varóns todos do pobo diante do Señor.

¹⁸ Non me ofrecerás o sangue dos sacrificios con pan lévedo. Non deixarás a graxa da festa ata a mañá.

¹⁹ Traerás á casa do Señor o teu Deus as primicias dos froitos da terra. Non cocerás o cabrito no leite da súa nai.

O anxo de Deus

²⁰ Eu vou mandar o meu anxo diante túa, para que te garde na viaxe e te leve ó lugar que che teño disposto.

²¹ Respéctao e faille caso. Non te rebeles contra el. Non perdoará as vosas rebeldías, pois leva con el o meu nome.

²² Se de verdade o obedeces e fas o que eu che mande, eu serei inimigo dos teus inimigos, adversario dos teus adversarios.

Na terra dos cananeos

²³ O meu anxo irá diante de ti e levarate á terra dos amorreos, dos hititas, dos perizitas, dos cananeos, dos hivitas e dos iebuseos, que eu destruirei.

²⁴ Non te prostrarás diante dos seus deuses nin os adorarás. Non farás o que fan eles, senón que os destruirás e romperás as súas imaxes.

²⁵ Vós serviredes ó Señor o voso Deus, e el bendicirá o voso pan e a vosa auga. Eu afastarei de ti todas as doenzas.

²⁶ Non haberá na túa terra muller estéril nin que aborte. E ateigareite de vida.

²⁷ Eu mandarei o meu terror diante de ti, espantarei os pobos ós que chegues, e todos os teus inimigos viraranse de costas ante ti.

²⁸ Mandarei diante de ti avésporas, que farán fuxir da túa presenza ós hivitas, ós cananeos, ós hititas.

²⁹ Non os botarei todos á vez, para que non quede a terra deserta e que non se multipliquen as feras salvaxes contra ti.

³⁰ Botareinos ós poucos, namentres ti vas crecendo e tomando posesión do país.

³¹ Fixarei os lindeiros da túa terra desde o mar Rubio ó mar dos filisteos e desde o deserto ata o Éufrates. Porei nas túas mans os habitantes do país, botareinos da túa presenza.

³² Ti non farás con eles nin cos seus deuses ningún pacto.

³³ Tampouco non os deixarás quedar na túa terra, para que non te fagan pecar contra min servindo ós seus deuses, que serán para ti unha trapela".